ໂທລະສັບມືຖື ແລະ Facebook ເປັນຕົວຢ່າງສິນຄ້າ ແລະ ການບໍລິການ ທີ່ເຮັດໃຫ້ຄົນສາມາດເຊື່ອມຕໍ່ກັນໄດ້ງ່າຍຂື້ນ. ທັງຍັງເປັນການແລກ ປ່ຽນຂ່າວສານໃນຍາມທີ່ຕ້ອງການ. ຍັງມີຫຼາຍໆສິນຄ້າ ແລະ ການບໍລິການທີ່ເຮັດໃຫ້ຊີວິດຄົນເຮົາມີຄວາມສະດວກສະບາຍກວ່າແຕ່ເກົ່າ.
ການຜະລິດສິນຄ້າ ຫຼື ການສະໜອງການບໍລິການເປັນການສະແດງເຖິງຫົວຄິດປະດິດສ້າງ ແລະ ຄວາມພາກພຽນພະຍາຍາມຂອງຜູ້ປະກອບການໃນການສ້າງສັນສິ່ງດີໆໃຫ້ແກ່ສັງຄົມ. ການຊົມໃຊ້ຂອງຄົນລາວຕໍ່ກັບສິນຄ້າຕ່າງປະເທດນັ້ນ ຍັງເພີ່ງພາການນຳເຂົ້າເຄື່ອງຈັກທັນສະໄໝ ເຊັ່ນ: ຍານພາຫະນະ, ເຄື່ອງມືການຜະລິດ ແລະ ຊ່ຽວຊານຕ່າງປະເທດທີ່ມີຫົວຄິດປະດິດສ້າງໃນການຜະລິດ ແລະ ການບໍລິການ. ງານວຽງຈັນ ເອກສໂປ 2015 ເປັນງານລວມ ຜະລິດຕະພັນເດັ່ນໆໄວ້ຫຼາຍອັນ ທີ່ເຮັດການຜະລິດຂື້ນໃນລາວ. ໃນງານຈະມີຫຼາຍໆສິນຄ້າທີ່ຖືກຜະລິດຂື້ນໃນລາວ ທັງຍັງເປັນການສະແດງ ວິວັດທະນາການຂອງການຜະລິດແບບທຳມະຊາດ ໄປສູ່ການຜະລິດແບບທັນສະໄໝ ເພື່ອສະແດງຄວາມເຂັ້ມແຂງ ທີ່ພ້ອມຈະແຂ່ງກັບຊາດອື່ນ.
ຕະຫຼອດການປົດປ່ອຍແຕ່ປີ 1975, ການພັດທະນາຂອງຊາດ ເປັນສິ່ງທີ່ມີມາແບບບໍ່ຢຸດຢັ້ງ. ໃນປະຈຸບັນ ເຖິງວ່າເສດຖະກິດຂອງລາວຍັງນ້ອຍ ເມື່ອທຽບໃສ່ຂົງເຂດດຽວກັນແລ້ວ ກໍ່ມີຫຼາຍສິນຄ້າທີ່ໄດ້ຮັບການສ້າງຂຶ້ນ ແລະ ເປັນໜ້າເປັນຕາຂອງປະເທດ. ສິນຄ້າສົ່ງອອກ ເປັນການສະແດງເຖິງການພັດທະນາ ແລະ ການເຮັດວຽກຢ່າງຈິງຈັງຂອງທັງພາກລັດ ແລະ ຕົວຜູ້ປະກອບການເອງທີ່ຍາມໃດກໍ່ຕ້ອງໄດ້ແຂ່ງຂັນ ການຜະລິດທີ່ມີຄຸນນະພາບ ເພື່ອຍາດແຍ່ງຕະຫຼາດ. ບໍ່ເນັ້ນໃສ່ແຕ່ມູນຄ່າການສົ່ງອອກ ແຕ່ເບິ່ງຄວາມຄິດສ້າງສັນ ແລະ ຄວາມໝາຍດ້ານວັດຖະນະທຳ, ແລະ ການຈ້າງງານໃນຂົງເຂດຊົນນະບົດແລ້ວ ຂ້າພະເຈົ້າໄດ້ ສັງລວມ 7 ສິນຄ້າທີ່ເປັນສິ່ງມະຫັດສະຈັນການປະດິດຂອງຄົນລາວ ມີຄືດັ່ງນີ້:
- ຫັດຖະກຳ
ມີຫາກຫຼາຍສິນຄ້າທີ່ນອນໃຫ້ຫັດຖະກຳ. ນັບແຕ່ເຄື່ອງປັ້ນດິນເຜົ່າ, ຫັດຖະກຳແຜນແພ, ແລະ ເຄື່ອງສານ. ສິນຄ້າດັ່ງກ່າວ ເປັນການສະແດງສິໄມ້ລາຍມືຂອງຫຼາຍໆຊົນຊາດຊົນເຜົ່າທີ່ມີການປະດິດ ເປັນການສະແດງລັກຊະນະຂອງວັດຖະນະທຳທ້ອງຖີ່ນ ກໍ່ຄືຂອງຊາດອອກສູ່ສາຍຕາສາກົນ. ມີສິນຄ້າຫັດຖະກຳຫຼາຍໆອັນສາມາດ ເປັນໜ້າເປັນຕາຂອງຊາດ. ການພັກດັນການຜະລິດ ແລະ ສົ່ງອອກຂອງສິນຄ້າດັ່ງກ່າວ ນອກຈາກຈະເປັນການຮັກສາຮີດຄອງປະເພນີແລ້ວ ຍັງເປັນການເຜີຍແຜ່ວັດຖະນະທຳ ແລະ ຮັກສາວັດຖະນະທຳຂອງຊາດໄວ້ອີກດ້ວຍ.
- ກາເຟ
ອຸດສາຫະກຳກາເຟ ເປັນໜຶ່ງອີກຜະລິດຕະພັນທີ່ມີການສະໜອງໃຫ້ແກ່ຕະຫຼາດໂລກ. ກາເຟລາວມີປະຫວັດການຜະລິດມາຍາວນານ ແລະ ການຜະລິດໄດ້ມີແຜ່ຫຼາຍໃນຂອບເຂດພາກໃຕ້ ແລະ ກຳລັງຂະຫຍາຍຕົວຫາທາງສ່ວນຕ່າງໆທີ່ມີເງື່ອນໄຂໃນການປູກ. ຄາດວ່າມີປະມານ 300,000 ຄົນ ເປັນຢ່າງຕໍ່າ ທີ່ທຳມາຫາກິນໃນຂະແໜງການດັ່ງກ່າວ. ຄວາມຍື່ນຍົງຂອງກາເຟ ແລະ ການສ້າງຊື່ສຽງໃຫ້ແກ່ກາເຟລາວ ກໍ່ຄືການສ້າງຄວາມໜັ້ນຄົງຂອງເສດຖະກິດ ແລະ ການນຳເອົາປະຊາຊົນກຸ່ມດັ່ງກ່າວອອກຈາກຄວາມທຸກຈົນ.
- ການທ່ອງທ່ຽວ
ຈັດເຂົ້າໃນໝວດຂອງການບໍລິການ. ການທ່ອງທ່ຽວ ເປັນການສ້າງລາຍຮັບໃຫ້ແກ່ຫຼາຍກຸ່ມ. ນັບແຕ່ບໍລິສັດທ່ອງທ່ຽວ, ໂຮງແຮມ, ຮ້ານອາຫານ. ການນຳນັກທ່ອງທ່ຽວເຂົ້າມາລາວ ເປັນການເຜີຍແຜ່ວັດຖະນະທຳ ແລະ ສ້າງລາຍຮັບແກ່ຄົນລາວ. ໃນແຕ່ລະເຂດຈະມີຈຸດຈູງໃຈໃຫ້ນັກທ່ອງທ່ຽວເຂົ້າມາ. ນອກຈາກຫຼວງພະບາງ ເຊິ່ງເປັນເມືອງມໍລະດົກໂລກແລ້ວ, ກໍ່ມີຫຼາຍໆແຂວງພັດທະນາແຫຼ່ງທ່ອງທ່ຽວຂອງຕົນເອງ ເຊັ່ນ: ວັດພູຈຳປາສັກ, ທົ່ງໄຮ່ຫີນ ແລະ ອື່ນໆ.
- ເຄື່ອງຕັດຫຍິບ
ມີການປະກອບສ່ວນຂອງແມ່ຍິງຫຼາຍທີ່ສຸດ. ແຮງງານແມ່ຍິງລາວເປັນອົງປະກອບສຳຄັນໃນການຂັບເຄື່ອນອຸດສາຫະກຳ. ນະໂຍບາຍ ຂອງບັນດາປະເທດນຳເຂົ້າຈາກກຸ່ມ ອີຢູ ຊ່ວຍເຮັດໃຫ້ມີນັກລົງທຶນເຂົ້າມາຕັ້ງຖານຜະລິດໃນລາວຫຼາຍ. ນອກນັ້ນ ຍັງມີການເຈລະຈາຂໍສິດທິພິເສດຕ່າງໆ ເພື່ອເຮັດໃຫ້ລາວທີ່ບໍ່ມີທາງອອກສູ່ທະເລ ມີຄວາມສາມາດໃນການແຂ່ງຂັນການຜະລິດ ໃນຕະຫຼາດໂລກ. ຂ້າພະເຈົ້າຍັງບໍ່ທັນໄດ້ມີໂອກາດເຫັນເຄື່ອງນຸ່ງທີ່ມີກາໜາຍວ່າ: Made in Laos ໃນເວລາໄປຕ່າງປະເທດເທື່ອ, ແຕ່ຂ້າພະເຈົ້າເຄີຍໃຊ້ສິນຄ້າທີ່ບໍ່ສາມາດສົ່ງອອກໄດ້ມາວາງຂາຍ ໃນຕະຫຼາດພາຍໃນແລ້ວເຫັນວ່າ ຄົນລາວມີຫົວຄິດປະດິດສ້າງຫຼາຍ, ຂະໜາດເປັນເຄື່ອງຕົກລະດັບຍັງດີປານນີ້.
- ກະສິກຳສະອາດ
ເປັນສິນຄ້າທີ່ຈະໄດ້ຮັບຄວາມນິຍົມຫຼາຍຂື້ນໃນຕໍ່ໜ້າ. ເພາະຄົນຕ້ອງການມີຊີວິດທີ່ຍື່ນຍາວ ແລະ ສຸກກະພາບແຂງແຮງ. ພືດທີ່ມາຈາກການຜະລິດກະສິກຳສະອາດ ຈະເປັນສ່ວນຜະກອບໃນການປຸ່ງແຕ່ງອາຫານທີ່ມີສານພິດເຈືອປົນໜ້ອຍທີ່ສຸດ. ອີກຢ່າງໜຶ່ງ, ປະຊາກອນກໍ່ນັບມື້ນັບເພີ້ມຂື້ນ ແຕ່ເນື້ອທີ່ການຜະລິດຍັງຄືເກົ່າ, ນັ້ນໝາຍວ່າການຜະລິດທີ່ດີ ແລະ ມີປະລິມານຫຼາຍກັບຄວາມຕ້ອງການຈະເປັນການສ້າງຄວາມຍືນຍົງໃຫ້ແກ່ກະສິກຳສະອາດຂອງລາວ. ແນ່ນອນຊາວກະສິກອນຈະເປັນຜູ້ໄດ້ຮັບຜົນປະໂຫຍດຢ່າງເຕັມທີ່.
- ເຂົ້າ
ມີບົດກ່າວຄວາມສຳຄັນຂອງເຂົ້າໃນເມື່ອກ່ອນ. ເຖິງວ່າຈະຍັງບໍ່ທັນສ້າງລາຍຮັບຫຼັກ ແຕ່ການຜະລິດເຂົ້າສະອາດ ກຳລັງໄດ້ຮັບການສະໜັບສະໜູນຈາກພາກລັດ ແລະ ການຕັດສິນໃຈສູງຂອງພາກທຸລະກິດ ເພື່ອຜະລິດເຂົ້າມີຄຸນນະພາບສູງ. ການສົ່ງອອກເຂົ້າໜຽວອາດນອນໃນຮູບແບບການປຸງແຕ່ງເປັນສ່ວນປະກອບອາຫານຫຼາຍໆປະເພດກ່ອນມີການສົ່ງອອກ ແລະ ການຜະລິດເຂົ້າຈ້າວ ໜ້າຈະມີປະລິມານຫຼາຍຂື້ນ ເພື່ອສະໜອງໃຫ້ແກ່ຕະຫຼາດໂລກທີ່ຕ້ອງການຫຼາຍ.
- ສາລີ
ປູກຫຼາຍໃນເຂດທາງພາກເໜືອ. ເປັນລາຍຮັບເສີມ ແລະ ຫຼັກຂອງບາງຄອບຄົວທີ່ຍຶດອາຊີບກະສິກຳໃນເຂດຊົນນະບົດ. ສາລີສັດ ແລະ ສາລີຫວານ ມີຄວາມຕ້ອງການ ໃນການປຸງແຕ່ງອາຫານສັດ ແລະ ເປັນເຄື່ອງດື່ມສຸກກະພາບ. ສາລີລາວເປັນທີ່ຕ້ອງການກໍ່ເນື່ອງຈາກວ່າ ໃນດິນຍັງມີແຮ່ທຳມະຊາດຫຼາຍ ໃນການສ້າງເມັດ ແລະ ຍັງມີແຮ່ທໍາມະຊາດທີ່ມະນຸດ ຄວນບໍລິໂພກ.
ຂ້າພະເຈົ້າເຊື່ອວ່າ ຫົວຄິດປະດິດສ້າງຂອງຄົນລາວນັ້ນມີຫຼາຍ ທີ່ຈະນຳມາພັດທະນາ ຂະແໜງການທີ່ກ່າວມາຂ້າງເທິງ. ໂດຍສະເພາະກະສິກຳສະອາດ ເພາະຈະເປັນການສ້າງລາຍຮັບໃຫ້ແກ່ປະຊາຊົນໄດ້ຢ່າງທົ່ວເຖິງ. ໃນປະຈຸບັນເປັນຍຸກບໍ່ມີພົມແດນ ແລະ ເຮັດໃຫ້ເປີດໂອກາດການຮຽນຮູ້ໃຫ້ຄົນລາວຍຸກໄໝ່ໆແບບບໍ່ມີຂອບເຂດ. ສິນຄ້າຈາກ ໄອທີ ແລະ ເຕັກໂນໂລຍີ່ແບບໄໝ່ໆ ຍັງຈຳກັດ ແຕ່ອາດມີນັກປະດິດຫົວໃສສ້າງຂື້ນມາໃນຕໍ່ໜ້າ. ຄາດເດົາວ່າ ໃນຊຸມປີຕໍ່ໜ້າ ຈະມີສິນຄ້າຮັບໃຊ້ພາຍໃນ ແລະ ສົ່ງອອກຕ່າງປະເທດຫຼາຍຂື້ນ. ຖ້າຫາກທ່ານມີຄວາມຄິດແລ້ວ ທ່ານຄວນນຳແນວຄວາມຄິດອອກມາເປັນສິນຄ້າ. ຖ້າຫາກທ່ານຢາກຜະລິດສິ່ງໃດໜຶ່ງແລ້ວ ທ່ານຈະຜະລິດ ຫຼື ໃຫ້ບໍລິການຫຍັງດີ ແກ່ສັງຄົມເພື່ອເອກອ້າງຄວາມເປັນຄົນລາວ.
Viengsombath Bangonesengdet Editor in chief
ຊ່ວຍສ້າງສັນສິງເປັນປະໂຫຍດແກ່ສັງຄົມ. ມີຄວາມສາມາດທີ່ມາຈາກປະສົບການ ແລະ ການສຶກສາ ຕິດພັນກັບຂົງເຂດ: ຍຸດທະສາດການບໍລິຫານ, ການຕະຫຼາດ, ການວາງແຜນທຸລະກິດ, ການຄ້າ ທາງອອນໄລ, ນະໂຍບາຍບຸກຂະລາກອນ, ປັບປຸງອົງການຈັດຕັ້ງ, ການສ້າງຍີ່ຫໍ້ສິນຄ້າ ແລະ ສອນ ເຕັກນິກການນຳພາ. ທ່ານສາມາດ ໃຊ້ບໍລິການພິເສດ ຫຼື ຕິດຕາມເຕັກນິກຜ່ານທາງເວັບໄຊນີ້.
