ປ່ຽນຢ້ານເປັນແຮງພັກດັນ

ຄວາມຢ້ານເປັນຈິດສຳນຶກທີ່ບັນທອນຄວາມສາມາດຂອງມະນຸດ ໃນການດຳລົງຊີວິດ. ມີຫຼາຍໆຄົນເຮັດວຽກງານ ຫຼື ມີຊີວິດກັບຄວາມຢ້ານ.

ສົມມຸດວ່າ ຄົນບໍ່ມີຄວາມຢ້ານໃນຊີວິດປະຈຳວັນແລ້ວ, ຄົນເຮົາກໍ່ຈະເຮັດວຽກງານ ແລະ ດຳລົງຊີວິດໃນດ້ານບວກ ຫຼາຍຂື້ນ. ກິດຈະກຳທີ່ເຮັດກໍ່ຈະເຕັມໄປດ້ວຍຄວາມມ່ວນຊື່ນ ແທ່ນທີ່ຈະເປັນໄປດ້ວຍຄວາມຢ້ານ.

ສິ່ງທຳອິດທີ່ຕ້ອງໄດ້ເຂົ້າໃຈກໍ່ຄື ຮັບຮູ້ຄວາມຢ້ານຂອງທ່ານວ່າແມ່ນຫຍັງ? ແລ້ວຕ້ອງປະເຊີນໜ້າກັບຄວາມຢ້ານ, ແລະເອົາຊະນະຄວາມຢ້ານຕ່າງໆໃຫ້ໄດ້. ແລ້ວສ້າງພະລັງໃນການພັກດັນ ແນວຄວາມຄິດຂອງຄວາມຢ້ານທີ່ທ່ານມີ?

ຄວາມຢ້ານຂອງຄົນມີຫຼວງຫຼາຍ ໃນເວລາທີ່ກຳລັງປະເຊີນໜ້າກັບສິ່ງໃດໜຶ່ງ, ຫຼື ເຮັດວຽກງານທີ່ສັບສົນ. ຄົນມັກຈະເກີດມີຄວາມຢ້ານ ເຊັ່ນ: ຢ້ານບໍ່ສຳເລັດ, ຢ້ານເຮັດບໍ່ໄດ້, ຢ້ານເສຍໜ້າ, ຢ້ານຄົນອື່ນເຫັນວ່າບໍ່ເກັ່ງ. ສິ່ງດັ່ງກ່າວນັ້ນ ຍັງບໍ່ທັນໄດ້ເກີດຂື້ນ ແຕ່ມັນເປັນພຽງຄວາມຄິດ.

ເມື່ອທ່ານເຫັນຄວາມຢ້ານດັ່ງກ່າວແລ້ວ, ສິ່ງທີ່ຕ້ອງໄດ້ເຮັດກໍ່ຄື ສຶກສາເບິ່ງວ່າ: ສິ່ງໃດທີ່ຕົນເອງມີຄວາມສາມາດໃນການປະຕິບັດວຽກງານ ແລະ ມີຫຍັງແດ່ທີ່ຍັງບໍ່ທັນໄດ້ຮູ້ຈັກ, ມີໃຜແດ່ສາມາດຖາມໄດ້ ແລະ ມີອັນໃດແດ່ທີ່ຕົນເອງຈະຕ້ອງໄດ້ເຝິກຝົນຕື່ມອີກ.  ຖ້າຫາກທ່ານປະຕິເສດ ວຽກງານທີ່ຄິດວ່າຕົນເອງເຮັດບໍ່ໄດ້ ກໍ່ຈະເປັນການຢຸດສະຫງັດຄວາມກ້າວໜ້າຫາຄວາມຮູ້ແບບໃໝ່ໆ ແລະ ການຮຽນຮູ້ຈາກຄົນທີ່ມີຄວາມຮູ້ໃນຂະແໜງດັ່ງກ່າວ.

ຄົນທີ່ປະເຊີນໜ້າກັບສິ່ງທີ່ຕົນເອງຢ້ານ ເປັນການບໍ່ປະປ່ອຍໃຫ້ຄວາມຢ້ານນັ້ນມາຄຸ້ມຄອງຊີວິດຂອງເຂົາເຈົ້າ. ແລະ ເປັນການປ່ອຍຕົນເອງເຂົ້າໄປເຮັດກັບວຽກງານທີ່ຕົນເອງເຄີຍຄິດວ່າຫຸ້ຍງຍາກ ຈະເປັນການສ້າງຄວາມໜັ້ນໃຈ ແລະ ເອົາຊະນະຄວາມຢ້ານໃນທີ່ສຸດ.

ຫຼາຍໆຄົນອາດມີຄວາມຢ້ານທີ່ແຕກຕ່າງກັນ. ເຊັ່ນ: ຢ້ານເວົ້າໃນເວທີສາທາລະນະ, ຢ້ານເວົ້າພາສາອັງກິດຜິດ, ຢ້ານຕ່າງໆນາໆ. ບໍ່ວ່າຈະແນວໃດກໍ່ຕາມ. ຖ້າຫາກມີການສຶກສາຄວາມຢ້ານທີ່ເຮົາມີແທ້ນັ້ນແມ່ນຫຍັງແລ້ວ, ທ່ານສາມາດເຂົ້າໄປເຮັດສິ່ງທີ່ທ່ານຢ້ານໄດ້ ແລະ ຮຽນຮູ້ຈັກການຕອບໂຈດຂອງຄວາມຢ້ານຕ່າງໆ. ແລ້ວທ່ານຈະຮູ້ວ່າ ຄວາມຢ້ານທີ່ເກີດຂື້ນນັ້ນເປັນພຽງຄວາມຄິດ ແລະ ຈະຜ່ານໄປຊື່ໆ.

ເຮົາຄວນເຮັດໃນສິ່ງທີ່ຢ້ານ ແລະ ຫາປະສົບການຈາກສິ່ງທີ່ທ່ານຄິດຢ້ານ. ຢ່າງໜຶ່ງຈະເປັນການເຮັດໃຫ້ເຮົາຮູ້ສິ່ງທີ່ເຮົາເຮັດ ແລະ ສ້າງຄວາມໜັ້ນໃຈວ່າສິ່ງທີ່ຄິດຢ້ານໄວ້ກ່ອນນັ້ນ ບໍ່ໄດ້ເປັນຄວາມຈິງເລີຍ.

ໃນເມື່ອທ່ານບໍ່ມີຄວາມຢ້ານແລ້ວ, ນັ້ນກໍ່ໝາຍວ່າ ທ່ານສາມາດເຮັດວຽກງານໃດກໍ່ໄດ້ທີ່ທ່ານຕ້ອງການ. ແລ້ວທ່ານຈະຊອກຫາແຮງປາດຖະໜາທີ່ແທ້ຈິງໄດ້ແນວໃດ.