ເມື່ອທ່ານເລີ່ມຄິດຫາສິ່ງ ທີ່ທ່ານຕ້ອງການເຮັດໃຫ້ຕົນເອງເປັນສຸກ. ທ່ານຈະເລີ່ມສ້າງໂອກາດແກ່ ການໄດ້ເຮັດ ສິ່ງນັ້ນໆ. ໃນເງື່ອນໄຂວ່າ, ສິ່ງທີ່ທ່ານມັກເປັນອຸດົມການ ທີ່ເປັນໄປໄດ້. ຫາກທ່ານວ່າ: ຢາກເປັນນັກອາວະກາດ ຍິງຄົນທຳອິດ, ສິ່ງນັ້ນຄົງເປັນໄປໄດ້ຍາກຫຼາຍ. ເພາະເງື່ອນໄຂ ແລະ ສະພາບແວດລ້ອມ ດັ່ງກ່າວ ຫາບໍ່ໄດ້ ໃນ ປະເທດລາວ. ອີກຢ່າງ, ທ່ານຕ້ອງໄດ້ຮັບການເຝິກຝົນເປັນເວລາຫຼາຍປີ.
ບົນເງື່ອນໄຂວ່າ: ສິ່ງທີ່ເຮົາຢາກເຮັດໃຫ້ຕົນເອງເປັນສຸກ ສາມາດເປັນໄປໄດ້ ແລະ ບໍ່ແມ່ນເພື່ອເປັນການອວດ ອ້າງຄົນ ອື່ນວ່າຕົນເອງເກັ່ງ ຫາກເປັນການເຮັດໄປເພາະເຮົາມັກ. ເມື່ອນັ້ນ, ທ່ານກະຈະເລີ່ມຊອກໂອກາດ ແລະ ໃຫ້ເວລາຕົນເອງເຮັດໃນສິ່ງທີ່ມັກ ໃນແຕ່ລະວັນ. ສຳລັບຂ້າພະເຈົ້າເອງ ສິ່ງທີ່ຢາກເຮັດອັນໜຶ່ງ ຄືການສົ່ງຂໍ້ຄວາມ ດີໆອອກສູ່ສັງຄົມ. ຈະເຮັດໄດ້ແນວໃດ? ທຳອິດກໍ່ແມ່ນສະໜັກນຳວາລະສານ ແລະ ສິ່ງພີມຕ່າງໆດ ແຕ່ກະບໍ່ປະ ຖືກເອີ້ນຕົວຈັກເທື່ອ. ຈົນຕັດສິນໃຈມາສ້າງເອງ ໂດຍເຫັນໂອກາດ ການສົ່ງຂໍ້ຄວາມຜ່ານທາງເວັບໄຊ໊ ແລະ ສື່ສັງຄົມ ອອນໄລ. ການສ້າງເວັບໄຊ໊ດ້ວຍຕົນເອງ ແລະ ບໍລິຫານວຽກງານທັງໝົດ ບໍ່ແມ່ນເລື່ອງງ່າຍ. ດ້ວຍຄວາມຢາກ, ຈິ່ງໄດ້ໃຫ້ເວລາຕົນເອງ ໃນການສຶກສາວິທີຕ່າງໆເທື່ອລະເລັກລະນ້ອຍ. ມັນບໍ່ແມ່ນເລື່ອງງ່າຍ. ຫາກມີຄົນມາຖາມ ວ່າເປັນສຸກບໍ່? ຄຳຕອບວ່າ “ເປັນສຸກ”, ແມ່ນບໍ່ມີປ່ຽນແປງແນ່ນອນ. ບັນຫາສຳຄັນທີ່ພົບນອກຈາກວຽກເຕັກນິກ ແມ່ນງົບປະມານ ໃນການສ້າງ. ຕ້ອງໃຊ້ຈ່າຍໃນສິ່ງຈຳເປັນທີ່ສຸດ. ກາຍນັ້ນແມ່ນເຮັດເອງ.
ໃນໜ້າທີ່ວຽກງານທີ່ທ່ານມັກຄືກັນ, ການໃຫ້ໂອກາດໄດ້ໃຫ້ຫລາຍຂຶ້ນໃນການເຮັດວຽດ, ແລ້ວທ່ານຈະກາຍເປັນຄົນທີ່ມີຄວາມສຸກໃນທຸກຈັງຫວະຊີວິດ ທີ່ດຳເນີນໄປພ້ອມໆກັບການ ເປີດຮັບໂອກາດໃຫ່ມໆ ໃຫ້ຫລາຍຂຶ້ນ. ທັງປັບແລະອອກແບບຊີວິດໃຫ້ເຫມາະກັບຕົວເອງ ເພື່ອໃຫ້ບັນລຸເປົ້າໝາຍທີ່ທ່ານຕ້ອງການ.
ສິ່ງໜຶ່ງທີ່ຂ້າພະເຈົ້າຄົ້ນພົບຄື, ເມື່ອເຮົາຮູ້ວ່າຕ້ອງການຫຍັງ, ເຮົາຈະພະຍາຍາມຢູ່ໃກ້ໆກັບສະພາບແວດລ້ອມ ທີ່ສະ ໜັບສະໜູນວຽກງານຂອງເຮົາ. ບໍ່ສະເພາະບຸກຄົນໃກ້ຕົວ, ຫາກຍັງເປັນນັກຂຽນ ແລະ ສື່ການຮຽນຮູ້ ຕ່າງໆທີ່ທ່ານຈະໄດ້ຮູ້ຈັກ. ບໍ່ສະເໜີໄປວ່າ ໃນການເຮັດວຽກງານທີ່ທ່ານມັກ ທ່ານຈະໄດ້ເຮັດກັບເພື່ອນ ທີ່ຮູ້ກັນ ດີມາກ່ອນ. ມັນອາດເປັນໂອກາດໃຫ້ທ່ານໄດ້ພົບກັບຄົນໃໝ່. ແລ້ວທ່ານຈະໃຊ້ເວລາຢ່າງສະຫລາດ ຢູ່ກັບຄົນທີ່ເຫັນຄຸນຄ່າຂອງທ່ານ.
ເມື່ອໃດທ່ານເຫັນເປົ້າໝາຍທີ່ຈະເຮັດໃຫ້ທ່ານເປັນສຸກ, ມັນຈະເຮັດໃຫ້ຕົວທ່ານເອງມີຄວາມກ້າຫານທີ່ຈະສະແດງຄວາມຮູ້ສຶກຂອງຕົວເອງອອກມາ ໃນວຽກງານສ້າງສັນຢ່າງເຕັມທີ່. ສິ່ງໜຶ່ງທີ່ທ່ານບໍ່ຄວນລື່ມກໍ່ຄື: ການບໍ່ປະຄົນຮັກ ໄວ້ທາງຫຼັງ. ເຮົາຕ້ອງເປີດໂອກາດໃຫ້ເຂົາເຈົ້າສະເໜີ. ການສື່ສານປະຈຸບັນນີ້ສາມາດເຮັດໄດ້ງ່າຍຂື້ນ ທ່ານຕ້ອງບໍ່ ກາຍເປັນຄົນຫຼົງໃນອຸດົມການ ຈົນລື່ມຕິດຕໍ່ກັບພໍ່ແມ່ ພີ່ນ້ອງ ຫມູ່ໆ. ເພາະຫາກເປັນແນວນັັ້ນ, ເຮົາກໍ່ຈະສູນເສຍຄວາມສຳພັນດີດີທີ່ເຄີຍມີມາແຕ່ໃດໆ. ສຳລັບຄົນທີ່ມີພູມລຳເນົາຫ່າງໄກຈາກບ້ານເກີດ, ການຫ່າງຫາຍຫລາຍປີ ອາດເຮັດໃຫ້ພໍ່ແມ່ເສຍໃຈ ທີ່ລູກ-ຫຼານ ບໍ່ເຄີຍໃຫ້ເວລາ.
ແນ່ນອນເງິນສຳຄັນ. ວຽກງານທີ່ທ່ານເຮັດດ້ວຍຄວາມຮັກ, ອາດມີຜົນຕອບແທນທາງການເງິນສູງ. ຈົນບາງຄັ້ງກາຍ ເປັນແຮງພັກດັນ ຈົນຫຼົງກັບຜົນຕອບແທນທາງວັດຖຸ. ຫາກເມື່ອໃດຮູ້ຕົວວ່າຕ້ອງເຈິກັບຄວາມຕາຍ, ເລື່ອງສຳຄັນຂອງຊີວິດ ຕິດພັນກັບເງິນທອງ, ຄວາມມັ້ງຄັ່ງທາງວັດຖຸ ກັບກາຍເປັນເລື່ອງທີ່ພວກເຂົາເຫັນວ່າບໍ່ສຳຄັນເທົ່າຄວາມຮັກທີ່ໄດ້ເຮັດວຽກງານທີ່ຕົນເອງມັກ ແລະ ໃຊ້ຊີວິດກັບຄົນທີ່ໃສ່ໃຈທ່ານ.
ເມື່ອຮູ້ຕົວວ່າທຸກຄົນມີເວລາຈຳກັດໃນການມີຊີວິດ, ຄົນເຮົາຈະໃຫ້ຄວາມສຳຄັນກັບຕົນເອງ ແລະ ຄົນທີ່ເຫັນຄຸນຄ່າ ໃນຕົວທ່ານເອງຫຼາຍກວ່າສິ່ງອື່ນໃດ. ພວກເຂົາຈະສ້າງໂອກາດໃຫ້ໄດ້ໃຊ້ຊີວິດຕິດ ແທດຫຼາຍທີ່ສຸດເທົ່າທີ່ຈະເປັນ ໄປໄດ້.
Viengsombath Bangonesengdet Editor in chief
ຊ່ວຍສ້າງສັນສິງເປັນປະໂຫຍດແກ່ສັງຄົມ. ມີຄວາມສາມາດທີ່ມາຈາກປະສົບການ ແລະ ການສຶກສາ ຕິດພັນກັບຂົງເຂດ: ຍຸດທະສາດການບໍລິຫານ, ການຕະຫຼາດ, ການວາງແຜນທຸລະກິດ, ການຄ້າ ທາງອອນໄລ, ນະໂຍບາຍບຸກຂະລາກອນ, ປັບປຸງອົງການຈັດຕັ້ງ, ການສ້າງຍີ່ຫໍ້ສິນຄ້າ ແລະ ສອນ ເຕັກນິກການນຳພາ. ທ່ານສາມາດ ໃຊ້ບໍລິການພິເສດ ຫຼື ຕິດຕາມເຕັກນິກຜ່ານທາງເວັບໄຊນີ້.
