ຫຼາຍຄົນທີ່ປະສົບຜົນສຳເລັດຕ່າງພາກັນເວົ້າວ່າ: ສິ່ງໃດທີ່ທ່ານຄິດຢາກເຮັດ ແມ່ນເປັນໜ້າທີ່ທີ່ໄດ້ຮັບການ ມອບ ໝາຍ ມາໃຫ້ປະຕິບັດ ໃນຊ່ວງການມີຊີວິດ. ຖ້າຕັ້ງໃຈເຮັດ, ຖອດຖອນບົດຮຽນ ແລະ ໜັ່ນປ່ຽນແປງຍຸດທະວິທີ, ວັນໜຶ່ງ ທ່ານຈະສຳເລັດ.
ຄັ້ງຫນຶ່ງຄົນບໍ່ເຄີຍເຊື່ອວ່າຄົນເຮົາຈະບິນໄດ້ ແຕ່ມື້ນີ້ຄົນເຮົາບິນໄປໄດ້ທຸກທີ່ທີ່ຢາກໄປ. ດັ່ງນັ້ນຈົ່ງຢ່າຟັງໃຜບາງຄົນບອກທ່ານວ່າ ສິ່ງທີ່ທ່ານຄິດຫລືກຳລັງເຮັດນັ້ນມັນເປັນໄປບໍ່ໄດ້. ຈົ່ງມີສັດທາຫລາຍພໍທີ່ຈະບໍ່ທໍ້ ແລະ ສ້າງຝັນໃຫ້ເປັນຈິງ. ຖ້າທ່ານຄິດວ່າທ່ານເປັນຄົນທີ່ບໍ່ເກັ່ງ ທ່ານກໍ່ຈະຄິດວ່າທ່ານບໍ່ມີຄວາມສາມາດພໍທີ່ຈະເຮັດໃຫ້ດີຂຶ້ນ. ຖ້າທ່ານຄິດວ່າທ່ານເປັນຄົນທີ່ບໍ່ມີວັນທີ່ຈະປະສົບຄວາມສຳເລັດ, ທ່ານກໍຈະບໍ່ພະຍາຍາມເຮັດຫຍັງໃຫ້ດີຂຶ້ນ ຫລື ປ່ອຍໃຫ້ຕົວເອງລົ້ມເຫລວ ຫລື ທ່ານຄິດວ່າທ່ານອ້ວນ ຫລື ເກີດມາອ້ວນທ່ານກໍຈະບໍ່ພະຍາຍາມລົດນ້ຳຫນັກ.
ຖ້າທ່ານຮູ້ວ່າທ່ານເປັນໃຜ ແລະ ທ່ານຕ້ອງການຫຍັງທ່ານກໍຈະຍອມເຮັດບາງສິ່ງບາງຢ່າງ ເພື່ອເຮັດໃຫ້ທ່ານມີທັກສະຄວາມສາມາດທີ່ທ່ານຢາກມີ. ຖ້າທ່ານຍັງບໍ່ຮູ້ວ່າທ່ານຕ້ອງການຫຍັງ, ສຸດທ້າຍທ່ານຈະມີຊີວິດທ່າມກາງສິ່ງທີ່ທ່ານບໍ່ຕ້ອງການ.
ຄົນທີ່ຢູ້ລອດໄດ້ໃນໂລກນີ້ບໍ່ແມ່ນຄົນທີ່ສະຫລາດທີ່ສຸດ ແຕ່ເປັນຄົນທີ່ປັບຕົວໄດ້ເກັ່ງທີ່ສຸດ. ຄົນທີ່ມີຈິດໃຈແຂງແກ່ນ ພ້ອມຮັບມືກັບທຸກສະຖານະການ ນອກຈາກຢູ່ລອດແລ້ວ ຍັງຢູ່ຢ່າງເປັນສຸກ. ຄົນສ່ວນໃຫ່ຍມັກຕັ້ງຂໍ້ຈຳກັດໃຫ້ຕົວເອງຫລາກຫລາຍເຊັ່ນ ຂ້ອຍບໍ່ແມ່ນຄົນທີ່ເຂົາຕ້ອງການ; ຂ້ອຍບໍ່ແມ່ນຄົນທີ່ຈະເປັນຫົວຫນ້າໃຜໄດ້; ຂ້ອຍບໍ່ແມ່ນຄົນທີ່ຈະເຮັດວຽກດ່ວນໆໄດ້ສຳເລັດ; ຂ້ອຍບໍ່ແມ່ນຄົນທີ່ຕື່ນເຊົ້າ ແລະ ຍັງມີອີກຫຼາຍໆຂໍ້ຄິດດ້ານລົບທີ່ສ້າງ ຂື້ນກັບຕົນເອງ. ຢ່າເຮັດໃຫ້ຊີວິດຍາກຂຶ້ນໄປອີກ. ໂດຍການຕັ້ງຂໍ້ຈຳກັດຫລວງຫລາຍໃຫ້ຕົວເອງ. ຄົນທີ່ຢູ່ລອດໃນໂລກນີ້ໄດ້ ຄືຄົນທີ່ປັບຕົວໃຫ້ເກັ່ງ ບໍ່ແມ່ນຄົນສະຫລາດທີ່ສຸດ. ຖ້າທ່ານບໍ່ປັບຕົວໃນທຸກສະຖານະການ ທ່ານຈະຕົກໃນສະຖານະການລຳບາກ.
ຖ້າທ່ານຢາກຈະປ່ຽນຊີວິດຂອງທ່ານ, ຕ້ອງເລີ່ມຈາກການປ່ຽນທັດສະນະຄະຕິ ປັບຄວາມຄິດ ແລ້ວເລີ່ມເຮັດສິ່ງ ໃໝ່. ທ່ານບໍ່ອາດຮູ້ໄດ້ວ່າຈະຕື່ນຂຶ້ນມາໃນມື້ອື່ນບໍ່. ຢ່າຖ້າຈົນຮອດມື້ທີ່ທ່ານໄດ້ຮູ້ວ່າ ທ່ານຈະບໍ່ມີເວລາເຫລືອໃຫ້ເຮັດສິ່ງທີ່ທ່ານເຄີຍຝັນສິ່ງທີ່ທ່ານຕ້ອງການທີ່ສຸດ. ດັ່ງນັ້ນເລີ່ມເຮັດໄດ້ແລ້ວ. ເລີ່ມຕອນທີ່ທ່ານອາດຍັງຄິດວ່າບໍ່ພ້ອມ. ເລີ່ມໄປເທື່ອລະເລັກນ້ອຍ.
ມື້ນີ້ຄືຂອງຂັວນທີ່ພິເສດ. ໃຜບາງຄົນບໍ່ມີໂອກາດໄດ້ຕື່ນຂຶ້ນມາ. ທ່ານໄດ້ຮັບ ມື້ນີ້ ມາຈັກເທື່ອແລ້ວໃນຊີວິດ? ຈົ່ງເຮັດທຸກວັນນີ້ຂອງທ່ານໃຫ້ດີທີ່ສຸດ. ໃຫ້ພິເສດກວ່າທີ່ເຄີຍ. ໃຫ້ດີຂຶ້ນກວ່າວັນວານ. ຈົ່ງຕື່ນ ແລ້ວຄວບຄຸມເບິ່ງແຍງຊີວິດຂອງທ່ານ.
ການເລືອກເປັນອິດສະຫຼະຈາກແນວຄິດຄົນອື່ນ ແລະ ເດີນເສັ້ນທາງເລືອກຂອງທ່ານ, ເປັນຫົນທາງສູ່ອິດສະຫລະພາບ. ທ່ານຈະມີອິດສະຫລະພາບຫຼາຍພໍທີ່ຈະເລືອກສິ່ງຫນຶ່ງຫລາຍກວ່າອີກສິ່ງຫນຶ່ງ. ເລືອກສິ່ງທີ່ທ່ານຕ້ອງການແທ້ໆໃນຊີວິດ. ດັ່ງນັ້ນຈົ່ງເລືອກຢ່າງມີສະຕິ ແລະ ເລືອກໃຊ້ຊີວິດທີ່ທ່ານຢາກເປັນ.
Viengsombath Bangonesengdet Editor in chief
ຊ່ວຍສ້າງສັນສິງເປັນປະໂຫຍດແກ່ສັງຄົມ. ມີຄວາມສາມາດທີ່ມາຈາກປະສົບການ ແລະ ການສຶກສາ ຕິດພັນກັບຂົງເຂດ: ຍຸດທະສາດການບໍລິຫານ, ການຕະຫຼາດ, ການວາງແຜນທຸລະກິດ, ການຄ້າ ທາງອອນໄລ, ນະໂຍບາຍບຸກຂະລາກອນ, ປັບປຸງອົງການຈັດຕັ້ງ, ການສ້າງຍີ່ຫໍ້ສິນຄ້າ ແລະ ສອນ ເຕັກນິກການນຳພາ. ທ່ານສາມາດ ໃຊ້ບໍລິການພິເສດ ຫຼື ຕິດຕາມເຕັກນິກຜ່ານທາງເວັບໄຊນີ້.
