ການຊື້ ແລະ ການຂາຍ ທາງອອນໄລ ປະກອບມີສອງພາກສ່ວນ ຫຼື ຫຼາຍກວ່ານັ້ນເຂົ້າມາມີສ່ວນຮ່ວມໃນການຊື້ຂາຍ. ແຕ່ລະພາກສ່ວນ, ມີບົດບາດ ແລະ ມີກົດເກນຂອງຕົນເອງ. ເວລາມີບັນຫາ, ຫຼາຍຝ່າຍຕ້ອງການຮ່ວມມືກັນຊອກຫາ ທາງແກ້ໄຂບັນຫາຮ່ວມກັນ ເພື່ອອຳນວຍຄວາມສະດວກ ໃນການຄ້າ.
ການຊໍາລະທາງອອນໄລເປັນໜຶ່ງສິ່ງສຳຄັນຫຼາຍ. ຕ້ອງມີລະບົບແນ່ນອນ ເພື່ອກີດກັ້ນໂອກາດໃຫ້ຂອງຄົນຂາຍ ຜູ້ບໍ່ຊື່ສັດ ໄດ້ຕົວະຍົວະ. ທຸກໆການຊຳລະທາງການຄ້າ, ກາຍເປັນສິ່ງທີ່ຍາກຂື້ນ ແລະ ສາມາດກາຍເປັນສິ່ງທີ່ບໍ່ໄດ້ຮັບຄວາມໄວ້ວາງໃຈ ໃນຍຸກທີ່ມີການຈໍລະກຳທາງອອນໄລເພີ່ມຂື້ນ.
E-commerce ຍັງເປັນສິ່ງໃໝ່ສຳລັບຫຼາຍຄົນ, ຈິ່ງເຮັດໃຫ້ຜູ້ທີ່ເຂົ້າມາຊົມໃຊ້ ຕ້ອງໄດ້ພະຍາຍາມສຶກສາກົດລະບຽບການຈັດຕັ້ງປະຕິບັດ ໃນການເຮັດການຄ້າຜ່ານທາງເອເລັກໂທນິກ ເພື່ອຈະຍົກລະດັບ ການພົວພັນການຄ້າຂື້ນສູ່ບາດກ້າວໃໜ່. ໄລຍະຂ້າມຜ່ານຂອງການຄ້າຜ່ານທາງເອເລັກໂທຼນິກ ຂຶ້ນກັບກຳມະສິດຂອງຜູ້ສ້າງເວັບ ແລະ ເຈົ້າຂອງເວັບໄຊທາງການຄ້າ, ຍ້ອນວ່າ: ເມື່ອໃດກໍ່ຕາມການຊຳລະທາງການຄ້າມີຄວາມຜິດພາດ ເຊິ່ງເກີດຂຶ້ນຍ້ອນການບໍ່ເຂົ້າໃຈ ຫຼື ບໍ່ມີຄວາມເຊື່ອໜັ້ນ, ໂດຍທົ່ວໄປຜູ້ຊື້ ຈະບໍ່ໃຊ້ເວລາໃນການຄົ້ນຄິດ ຂໍ້ຄວາມທີ່ສະແດງໃນເວັບໄຊ ຫຼື ຈະບໍ່ສົນໃຈກັບສິ່ງທີ່ເຈົ້າຂອງເວັບໄຊໃຫ້ຄຳໝັ້ນສັນຍາໄວ້ກ່ອນການຊື້ຂາຍ. ຖ້າຫາກລູກຄ້າທ່າແຮງມີຄວາມສົງໃສ ເຂົາເຈົ້າຈະອອກຈາກການຊື້ຂາຍເລີຍ; ເຈົ້າຂອງເວັບໄຊຕ້ອງໄດ້ລົງທຶນໃນການສ້າງຄວາມເຊື່ອ ໜັ້ນ ກັບລູກຄ້າກຸ່ມນັ້ນ, ເຊິ່ງຕ້ອງໄດ້ເຂົ້າໃຈກົນໄກການສ້າງສາຍພົວພັນທີ່ດີຂື້ນ ໂດຍເລີ່ມຈາກຮູບແບບແລະ ບົດບາດຂອງທຸລະກິດທີ່ສະໜອງໃຫ້ລູກຄ້າ. ມາເບິ່ງແນວຄວາມຄິດຂອງແຕ່ລະພາກສ່ວນທີ່ມີສ່ວນຮ່ວມໃນການຊື້ຂາຍທາງອອນໄລ:
1. ຄວາມຄາດຫວັງ ຜູ້ຊື້
ຜູ້ຊື້ ມີສາມສິ່ງທີ່ສຳຄັນທີ່ຄາດຫວັງພາຍຫຼັງການຊຳລະ; ສິ່ງໃດກໍ່ຕາມທີ່ມາກະທົບໃສ່ສາມສິ່ງດັ່ງຕໍ່ໄປນີ້ ຈະເປັນການລັງເລໃນການຕັດສິນໃຈຂອງຜູ້ຊື້; ເຊິ່ງມີດັ່ງຕໍ່ໄປນີ້:
- ຢາກຕັດສິນໃຈຊື້ສິ່ງໃດໜຶ່ງ (ສິ່ງໃດ, ເມື່ອໃດ, ງົບປະມານ, ຄວາມໄວ້ວາງໃຈ, ແລະ ອື່ນໆ.)
- ຢາກໃຫ້ມີການຈ່າຍເງິນທີ່ມີປະສິດທິຜົນ (ການເກັບເງິນທີ່ຖືກຕ້ອງ, ຄວາມປອດໄພ, ການປົກປ້ອງ, ແລະ ອື່ນໆ.)
- ຢາກເປັນເຈົ້າຂອງໃນສິ່ງທີ່ພວກເຂົາໄດ້ຊື້ແລ້ວຕາມການສະແດງຂໍ້ມູນຕົວຈິງ (ສະຖານະພາບຂອງການສັ່ງ, ການສົ່ງແລະ ອື່ນໆ.)
ຖ້າຫາກພໍ່ຄ້າຫາກບໍ່ສາມາດຕອບສະໜອງໄດ້ຕາມການຄາດຫັວງຂອງຜູ້ຊື້ດັ່ງກ່າວໄວ້ໄດ້ ຫຼືວ່າເຮັດໃຫ້ເຂົາເຈົ້າຜິດຫັວງ ຫຼື ບໍ່ມີຄວາມໂປ່ງໃສ ຜູ້ຊື້ຈະບໍ່ມີຄວາມເພິ່ງພໍໃຈທັນທີ. ການບໍ່ປະຕິບັດຕາມການສັ່ງຊື້ເຄື່ອງ ຈະເປັນສາເຫດຂອງການຍົກເລີກການເຮັດທຸລະກິດ.
ຜູ້ຊື້ເຄື່ອງທາງອອນໄລ ມັກຈະຊອກຫາຄຸນລັກສະນະທົ່ວໆໄປດັ່ງຕໍ່ໄປນີ້:
- ຊອກລາຄາທີ່ຖືກທີ່ສຸດ. ມີການສຶກສາຫຼາຍອັນໄດ້ສະແດງໃຫ້ເຫັນວ່າ: ຄົນມັກຈະປຽບທຽບລາຄາໃນເວລາທີ່ມີ ການຊື້ທາງອອນໄລ ເພື່ອເລືອກລາຄາທີ່ຖືກທີ່ສຸດ.
- ສາມາດແລກປ່ຽນຄຳຄິດເຫັນກັບຄົນອື່ນໄດ້: ຄົນສາມາດສອບຖາມປະສົບການ ການຊື້ຂາຍຜ່ານມາ ກັບຄົນອື່ນໆໄດ້. ຈຳເປັນຫຼາຍທີ່ຕ້ອງສ້າງຄວາມເປັນມິດໃຫ້ແກ່ລູກຄ້າ.
- ຄວາມໄວ້ວາງໃຈໄດ້: ລູກຄ້າມັກເລືອກເວັບໄຊໃຫ້ບໍລິການ e-commerce ທີ່ໄວ້ວາງໃຈໄດ້, ກ່ອນທີ່ຈະ ຕັດ ສິນໃຈຊື້ ແລະ ການຕັດສິນໃຈດັ່ງກ່າວແມ່ນອີງຕາມຄວາມເຂົ້າໃຈຂໍ້ຄວາມ ແລະ ຮູບແບບການນຳ ສະເໜີພາບພົດດີໆຕາມຄວາມເປັນຈິງ.
- ເວັບໄຊ໊ເປັນຖານທຸລະກິດທາງອອນໄລ. ການສ້າງຄວາມຮັບຮູ້ເວັບໄຊໃຫ້ແກ່ຜູ້ນຳໃຊ້ ມີຜົນໃນການຕັດສິນໃຈຊື້ສິນຄ້າຈາກເວັບໄຊ. ທ່ານສາມາດ ນຳເອົາສື່ການໂຄສະນາ, ການປະຊາສຳພັນ, ແລະ ການໃຊ້ສື່ໂຄສະນາຕ່າງໆ ຈະມີບົດບາດ ໃນການເພີ່ມ ຄວາມຮັບຮູ້ໃຫ້ແກ່ຜູ້ນຳໃຊ້ເວັບໄຊ໊.
2. ຄວາມຄາດຫວັງ ຜູ້ຂາຍ
ເວັບໄຊທີ່ສະໜອງການຄ້າຜ່ານທາງເອເລັກໂທຼນິກ ມັກຈະເກັບສະຖິຕິຂອງຜູ້ຊື້ແຕ່ລະຄົນ. ການນັບຈຳນວນທີ່ຂາຍໄດ້ເປັນການຮັບຮູ້ທິດທາງຄວາມຕ້ອງການ: ການເຂົ້າມາໃນເວັບໄຊຫຼາຍຂື້ນ, ໜ້າເວັບໄຊໃດທີ່ມີຄົນເຂົ້າຊົມຫຼາຍຂື້ນ, ການເຂົ້າ-ອອກເວັບໄຊມີຫຼາຍກໍ່ໝາຍເຖິງ ການມີໂອກາດ ໄດ້ຮັບລາຍໄດ້ເພີ່ມ. ການສ້າງໃຫ້ຜູ້ຊົມໃຊ້ ຮັບຮູ້ຍີ່ຫໍ້ໃດໜຶ່ງໃນເວັບໄຊຂອງຕົນເອງ ເປັນສິ່ງທີ່ຕ້ອງເຮັດກ່ອນສິ່ງອື່ນໝົດ, ເຖິງແນວໃດກໍ່ຕາມ, ການທີ່ຈະເຮັດ ໃຫ້ເປັນທີ່ຮູ້ຈັກກັນດີຕ້ອງໃຊ້ເວລາເປັນປີ ແລະ ມີຫຼາຍເທັກນິກຜ່ານສື່ສັງຄົມອອນໄລ ສາມາດນຳມາໃຊ້ໄດ້ຜົນດີ.
ຄົນຂາຍເຄື່ອງທາງ ເວັບໄຊ e-commerce ແມ່ນສ້າງຂື້ນເພື່ອເປົ້າໝາຍທາງກຳໄລການເງິນ. ເພື່ອໃຫ້ໄດ້ ຕາມຈຸດປະສົງດັ່ງກ່າວຕ້ອງ: ການເພີ່ມຄົນເຂົ້າຊົມເວັບໄຊໃຫ້ຫຼາຍຂື້ນ, ເປັນການປຸກລະດົມໃຫ້ຄົນສົນໃຈເຂົ້າມາເບິ່ງເວັບໄຊຈິ່ງເປັນສິ່ງຈຳເປັນ. ການໂຄສະນາ, ການຖະແຫຼງຂ່າວ, ການສະແດງຕາມສື່ ຕ່າງໆ, ສະເໜີເວັບໄຊ໊ໃຫ້ແກ່ຄູ່ຮ່ວມການຄ້າຮູ້ແລະເຊື່ອໜັ້ນ. ນີ້ເປັນສິ່ງທີ່ມີຄວາມສຳຄັນຢ່າງຍິ່ງ, ສຳລັບການສ້າງ ແລະ ການຄົງຄວາມຮັບຮູ້ເວັບໄຊ໊ໃນສາທາລະນະຊົນ. ສິ່ງທີ່ສຳຄັນ ໃນການຄວບຄຸມຂະບວນການຕັດສິນໃຈກໍ່ຄື: ອົງປະກອບທີ່ນຳເຂົ້າມາໃນເວັບໄຊໃໝ່ ຈະເຮັດໃຫ້ມີການປ່ຽນແປງເວັບໄຊ ແລະ ສິ່ງໃໝ່ໆດັ່ງກ່າວ ມັນຈະເປັນສິ່ງທີ່ລົບກວນການຊື້ຈາກເວັບໄຊຫຼືບໍ່?
3. ຄວາມຄາດຫວັງ ພໍ່ຄ້າຄົນກາງ
ຍັງມີຫຼາຍເວັບໄຊ໊ເຮັດເປັນສື່ກາງ ໃນການຊື້ຂາຍ ຫຼື ອ້ານເອີ້ນໄດ້ວ່າເປັນພໍ່ຄ້າຄົນກາງ. ບົດບາດໃນໂລກຂອງ ebusiness/ecommerce ຖືເປັນຜູ້ທີ່ຢູ່ໃນຂະບວນການຊື້, ອາດຈະຊື້ໃນສາງເກັບເຄື່ອງ, ອາດຈະຈັດສົ່ງ ສິນຄ້າທາງເຮືອ, ຈັດສົ່ງທາງໄປສະນີ, ອາດຈະເຮັດການຊຳລະ, ຫຼື ອາດຈະໃຫ້ການບໍລິການຫຼັງຂາຍ, ອື່ນໆ. ເວັບສື່ກາງໃນການໂຄສະນາຂາຍເຄື່ອງປາກົດມີຫຼາຍ. ເປັນຕົ້ນ Amazon.com. ເຂົາເຈົ້າເຮັດວຽກໃນການໂຄສະນາ ແລະ ສ້າງຮູບແບບການຊື້ຂາຍທີ່ໜ້າເຊື່ອຖື. ທັງຍັງເປັນຝ່າຍກວດສອບ ແລະ ຢັ້ງຢືນຄຸນນະພາບສິນຄ້າ, ເປັນຕົ້ນ.
ຮູແບບການການເຂົ້າມາຮ່ວມຕົວກັນຂອງ ຜູ້ຊື້, ຜູ້ຂາຍ ແລະ ພໍ່ຄ້າຄົນກາງ (ເວັບກາງ) ເປັນການສົ່ງເສີມໃຫ້ມີ ການຊື້ຂາຍ ໂດຍກົງລະຫວ່າງຜູ້ຊື້-ຂາຍ, ກາຍເປັນຊຸມຊົນຊື້ຂາຍທາງອອນໄລຂະໜາດໃຫຍ່ ເຊັ່ນ: eBay, ເປັນການເຂົ້າຫາລູກຄ້າໂດຍກົງໃນວົງກວ້າງ ແລະ ກະເຮັດໃຫ້ຜູ້ຊື້ສາມາດເຫັນຜູ້ຂາຍຫຼາຍຄົນໄດ້ຄືກັນ.
Viengsombath Bangonesengdet Editor in chief
ຊ່ວຍສ້າງສັນສິງເປັນປະໂຫຍດແກ່ສັງຄົມ. ມີຄວາມສາມາດທີ່ມາຈາກປະສົບການ ແລະ ການສຶກສາ ຕິດພັນກັບຂົງເຂດ: ຍຸດທະສາດການບໍລິຫານ, ການຕະຫຼາດ, ການວາງແຜນທຸລະກິດ, ການຄ້າ ທາງອອນໄລ, ນະໂຍບາຍບຸກຂະລາກອນ, ປັບປຸງອົງການຈັດຕັ້ງ, ການສ້າງຍີ່ຫໍ້ສິນຄ້າ ແລະ ສອນ ເຕັກນິກການນຳພາ. ທ່ານສາມາດ ໃຊ້ບໍລິການພິເສດ ຫຼື ຕິດຕາມເຕັກນິກຜ່ານທາງເວັບໄຊນີ້.
