ມຸມ ແລະ ລະບຽງອົງສາອຽງ ຂອງຕຶກ ຊື່ “ປີຊາ ທາວເວີ້ – Pisa Tower” ໃນປະເທດ ອິຕາລີ້, ກາຍເປັນສິ່ງກໍ່ສ້າງ ທີ່ຫຼາຍໆຄົນຢາກເຫັນ. ຊີວິດຂອງເຮົາບໍ່ຍາກເກີນໄປທີ່ຈະສ້າງມູມມອງ ແລະ ລະບຽງທີ່ດີໃຫ້ກັບຕົວເອງ. ເຊິ່ງເປັນການປັບອົງສາຂອງຊີວິດຈິດໃຈໃຫ້ມີຫລຽມ ທີ່ເຮັດໃຫ້ເບິ່ງຄືວ່າສັບສົນ ອາດເປັນຄວາມອ່ຽງເຊິ່ງອາດເບິ່ງແຕກຕ່າງຈາກວິທີ່ຄິດທົ່ວໄປ. ແຕ່ກໍ່ເປັນຄວາມອຽງທີ່ມີຄວາມອີ່ມເອີບໃຈ ໃນຄວາມຖືກຕ້ອງແຝງຢູ່ສະເຫມີ.
ຫາກເຮົາມີໂອກາດພິຈາລະນາຊີວິດຈິດໃຈຂອງຕົວເຮົາ ບາງຄັ້ງການໄດ້ນັ່ງເບິ່ງໃຈຕົວເອງທີ່ສະຫງົບເຢັນ ເປັນການເບິ່ງເຫັນສິ່ງທີ່ປອດໂປ່ງ, ສະບາຍເຫລືອເກີນຈົນເຮັດໃຫ້ຮູ້ສຶກໄດ້ວ່າ ຄວາມສຸກນັ້ນເປັນສິ່ງທີ່ສາມາດເກີດຂຶ້ນໄດ້ງ່າຍໆໂດຍບໍ່ຕ້ອງຫາວັດຖຸຫລອກລໍ້ແຕ່ຢ່າງໃດ.
ຍິ່ງເມື່ອເຮົາໄດ້ມີໂອກາດທົບທວນຊີວິດທີ່ເກີດຈາກປະສົບການຜ່ານການໃຊ້ຊີວິດມາດົນ, ການໄດ້ສົນທະນາ ແລະໄດ້ຮັບຮູ້ມູມມອງຈາກທ່ານເຫລົ່ານັ້ນ. ກັບສົ່ງຜົນໃຫ້ເຮົາມີຄວາມເຂົ້າໃຈຊີວິດໃນອີກຮູບແບບຫນຶ່ງ. ການໄດ້ສົນທະ ນາກັບຄົນທີ່ຜ່ານການໃຊ້ຊີວິດດົນ ເຮັດໃຫ້ໄດ້ເກັບກ່ຽວຄວາມຮູ້ທັງຈາກຄວາມຄິດ ແລະ ວິຖີຊີວິດທີ່ເຂົາມີ ແລະ ເປັນຢູ່. ເພື່ອນຳມາສອນໃຈຕົວເອງໃຫ້ເຕີບໂຕ ບົນພື້ນຖານທີ່ມີຄົນຄອຍເຕືອນໃຈເຮົາ.
ມີເລື່ອງຫນຶ່ງທີ່ຜູ້ຂຽນໄດ້ຮັບຮູ້ຈາກຄົນລູ້ນກ່ອນຄື: ເລື່ອງມຸມມອງທີ່ເກີດຂຶ້ນຈາກການສ້າງບ້ານເປັນມຸມມອງທີ່ເກີດຈາກອົງປະກອບຕ່າງໆຂອງບ້ານທີ່ໄດ້ເກີດຂຶ້ນແລ້ວນ້ອມມາສູ່ໃຈເພື່ອເປັນຄູສອນໃຫ້ເຮົາຮູ້ຈັກຄິດໃຫ້ເປັນ.
ດ້ວຍການສ້າງເຮືອນຫລັງຫນຶ່ງໃຫ້ມີຄວາມຫນ້າຢູ່ ແລະ ມີຄວາມສວຍງາມດ້ານສິນລະປະ ເພື່ອການສະແດງ ຄວາມງາມນັ້ນ ສິ່ງທີປະຕິເສດບໍ່ໄດ້ກໍຄື: ການອອກແບບບ້ານທີ່ມີມຸມ ແລະລະບຽງເປັນຈຸດຄົນຈັບຕາເບິ່ງ. ມູມ ແລະ ລະບຽງທີ່ເກີດຂຶ້ນເປັນສິ່ງທີ່ເຮັດໃຫ້ບ້ານມີຮູບຊົງ ແລະ ຄວາມງາມທີ່ເປັນສະເຫມືອນການໂຊສິນລະປະຂອງນາຍຊ່າງຜູ້ອອກແບບ ແລະ ເຈົ້າຂອງບ້ານວ່າ ເປັນຄົນທີ່ລົດສະນິຍົມເຊັ່ນໃດຢູ່ໃນຕົວ.
ການອອກແບບຊີວິດເຊັ່ນດຽວກັນ, ຄົນເຮົາຄວນຮູ້ຈັກສ້າງ “ມຸມ ແລະ ລະບຽງໃຫ້ກັບຕົວເອງ” ເພື່ອໃຫ້ຕົວເຮົາໄດ້ມີໂອກາດຫລົບມູມໃນວັນທີ່ຊີວິດມີບັນຫາຄວາມວ້າວຸ້ນ ຫລື ພັກຜ່ອນງຽບໆ. ເຖິງວ່າໃນວັນຊີວິດຈະປົກກະຕິສຸກດີ ສ້າງທາງເລືອກຫລາກຫລາຍໂດຍມີສິນລະປະຂອງການໃຊ້ຊີວິດ ໃຫ້ມີຄວາມສຸກເປັນລາງວັນຕອບແທນ. ເພາະຫາກມີບັນຫາຈາກມູມຫນຶ່ງ ທີ່ເຄີຍເບິ່ງເຫັນ ແລະ ແກ້ໄຂໄດ້ເຮົາອາດຈະຫຍັບ ເຂົ້າໄປອີກມູມຫນຶ່ງ ທີ່ຊ່ວຍເຮັດໃຫ້ໄລຍະຂອງບັນຫາຍ່າງອອກໄປ, ເຮັດໃຫ້ເຫັນມູມໃຫ່ມທີ່ຊ່ວຍແກ້ໄຂບັນຫານັ້ນໄດ້.
ເປັນການປັບອົງສາຂອງຄວາມຮູ້ສຶກທີ່ມີຕໍ່ເລື່ອງທີ່ຜ່ານມາ ໃຫ້ຢູ່ຕຳແຫນ່ງທີ່ພໍດີ. ເຊິ່ງຈະເຮັດໃຫ້ຊີວິດຈິດໃຈຂອງເຮົາຮູ້ຈັກ ປັບຕົວທີ່ຈະຢູ່ກັບສິ່ງນັ້ນໆ ຫລື ຖອຍອອກມາຈາກສິ່ງທີ່ກຳລັງກ່ຽວພັນໂດຍບໍ່ໃຫ້ສິ່ງເຫລົ່ານັ້ນພົວພັນຕົວເຮົາໃຫ້ຫຍຸ້ງໄດ້. ຖືວ່າເປັນການສ້າງຄວາມເປັນສະຖາປານິກໃນການອອກແບບໃຫ້ກັບບ້ານ ຄືສ້າງໃຫ້ຊີວິດຫນ້າຢູ່ຂຶ້ນ. ຈົນກະທັ້ງເປັນຊີວິດແຫ່ງການຮຽນຮູ້ ທີ່ຈະເປັນວິສະວະກອນເພື່ອຄວບຄຸມການກໍ່ສ້າງຊີວິດ ໃຫ້ເປັນໄປຢ່າງທີ່ໃຈຕ້ອງການ.
ເມື່ອສ້າງຄວາມເຂົ້າໃຈໃນຊີວິດ. ບາງມຸມເກົ່າໆທີ່ເປັນຢູ່ປະຈຳ ກໍ່ມັກຈະເຮັດໃຫ້ເຮົາຈົມຢູ່ກັບຄວາມຮູ້ສຶກນັ້ນໆຝ່າຍດຽວ. ຈົນເປັນຄວາມຊິນເຄີຍທີ່ຈະກ້າວໄປສູ່ສິ່ງໃຫ່ມທີ່ດີກວ່າ. ຍິ່ງຫາກເປັນມຸມມອງທີ່ເຮັດໃຫ້ຊີວິດຕິດລົບແລ້ວການຕິດຢູ່ໃນມຸມອັບຂອງຄວາມຮູ້ສຶກທີ່ເກີດຂຶ້ນໃນໃຈ ຍ່ອມເຮັດໃຫ້ເຮົາຈົມຢູ່ກັບຄວາມເສົ້າຕະຫລອດໄປ. ແຕ່ຫາກຮູ້ຈັກຈະດຶງຕົວເອງໃຫ້ຫລຸດອອກມຸມອັບຂອງໃຈ, ຮູ້ຈັກປັບໃຫ້ມີຄວາມຄິດໃນມຸມມອງທີ່ໃຫ່ມກວ່າ ອາດເລີ່ມຕົ້ນດ້ວຍການຕັ້ງຄຳຖາມກັບຕົນເອງ ແລ້ວກັບມາເບິ່ງວ່າສິ່ງທີ່ເຮົາເປັນຢູ່ນີ້ມີຜົນດີຫລືເສຍຢ່າງໃດ? ຮູ້ຈັກຍອມຮັບຄວາມບົກພ່ອງທີ່ມີ ແລະ ກ້າທີ່ຈະຖອຍອອກຈາກມຸມເດີມ. ກ້າທີ່ຈະແຫວກແນວຄວາມຄິດເດີມທີ່ມີຢູ່ໃຫ້ພັດທະນາເປັນມຸມມອງໃຫ່ມທີ່ດີກວ່າໃນແບບສະບັບຂອງຕົວເອງ. ເຮົາຍ່ອມມີມູມມອງຂອງຄວາມສຸກໃນແບບສະບັບທີ່ເປັນສ່ວນຕົວ.
ຂະນະດຽວກັນເມື່ອມີມຸມມອງຂອງຊີວິດທີ່ດີຂຶ້ນແລ້ວ ການຮູ້ຈັກສ້າງລະບຽງໃຫ້ຍື່ນອອກມານອກຕົວບ້ານ ເຊິ່ງເປັນເຫມືອນການມີທີ່ໄວ້ຄອຍຮັບລົມເຢັນທີ່ພັດເຂົ້າມາ ຖືວ່າເປັນການຕໍ່ຍອດສິ່ງດີທີ່ມີຢູ່ໃຫ້ດີຂຶ້ນເລື່ອຍໆ. ເພາະລະບຽງນັ້ນຊື່ວ່າເປັນອີກມິຕິຫນຶ່ງທີ່ເຮັດໃຫ້ເຈົ້າຂອງບ້ານ ໄດ້ມີພື້ນທີ່ຫລົບມຸມພັກ ເມື່ອຕ້ອງການຄິດແກ້ໄຂໃຫ້ບັນຫາຜ່ອນຄາຍ ຫລື ເມື່ອຕ້ອງການຄົ້ນຫາຄຳຕອບບາງຢ່າງງຽບໆຢູ່ລຳພັງ.
ຊີວິດຂອງເຮົາກໍເຊັ່ນດຽວກັນ. ມັນບໍ່ຍາກເກີນໄປທີ່ຈະສ້າງມຸມມອງ ແລະ ລະບຽງທີ່ດີໃຫ້ກັບຕົວເອງ. ເຊິ່ງເປັນການປັບອົງສາຂອງຊີວິດຈິດໃຈໃຫ້ມີຫລ່ຽມທີ່ຊວນໃຫ້ສົນໃຈ ແລະ ຂໍໃຫ້ມີລະບຽງອັນປຽບເປັນເທັກນິກຂອງຊີວິດເພື່ອໄວ້ໃຊ້ລະບາຍເລື່ອງທີ່ວຸ້ນວາຍ ໃຫ້ກາຍເປັນຄວາມງຽບສະຫງົບເຢັນໃນທຸກກໍລະນີ.
Viengsombath Bangonesengdet Editor in chief
ຊ່ວຍສ້າງສັນສິງເປັນປະໂຫຍດແກ່ສັງຄົມ. ມີຄວາມສາມາດທີ່ມາຈາກປະສົບການ ແລະ ການສຶກສາ ຕິດພັນກັບຂົງເຂດ: ຍຸດທະສາດການບໍລິຫານ, ການຕະຫຼາດ, ການວາງແຜນທຸລະກິດ, ການຄ້າ ທາງອອນໄລ, ນະໂຍບາຍບຸກຂະລາກອນ, ປັບປຸງອົງການຈັດຕັ້ງ, ການສ້າງຍີ່ຫໍ້ສິນຄ້າ ແລະ ສອນ ເຕັກນິກການນຳພາ. ທ່ານສາມາດ ໃຊ້ບໍລິການພິເສດ ຫຼື ຕິດຕາມເຕັກນິກຜ່ານທາງເວັບໄຊນີ້.
