ການນຳໃຊ້ເຄື່ອງມືສົ່ງເສີມການຄ້າຂາຍທາງອອໄລ ເປັນພຽງຮູບແບບເສີ່ມທຸລະກິດທີ່ມີຢູ່ແລ້ວ. ເຄື່ອງມືທາງອອນໄລ ຈະມີປະສິດທິຜົນດີກໍ່ຍັງຕ້ອງໄດ້ຂື້ນກັບລະບົບທຸລະກິດທີ່ທ່ານກຳລັງດຳເນີນໃນບໍລິສັດ.
ສິ່ງທີ່ທ່ານຕ້ອງໄດ້ຄຳນຶງໃນການນຳໃຊ້ເຄື່ອງມື ICT ເຂົ້າມາຮັບໃຊ້ໃນທຸລະກິດກໍ່ຄື: ຈະເອົາເຂົ້າມາແກ້ບັນຫາໃດ ໃນທຸລະກິດທີ່ທ່ານກຳລັງດຳເນີນຢູ່? ເພື່ອພັກດັນໄປສູ່ ການພັກດັນການບໍລິຫານພາຍໃນບໍລິສັດ, ສ້າງຜົນກຳໄລ, ຫຼຸດຕົ້ນທຶນການເຮັດທຸລະກິດ, ມີຄວາມສາມາດສູງໃນການເຂົ້າສູ່ຕະຫຼາດໃໝ່ ຫຼື ເຂົ້າສູ່ລູກຄ້າຫຼາກຫຼາຍກຸ່ມ ໃນຕະຫຼາດດຽວກັນ, ສະໜອງການບໍລິການລູກຄ້າໃນຂອບເຂດທົ່ວໂລກ, ເພື່ອແຂ່ງຂັນກັບຄົນອື່ນ. ເພື່ອເຮັດໃຫ້ໄດ້ຕາມຈຸດປະສົງທີ່ທ່ານຕ້ອງການ, ທີມງານບໍລິຫານງານທີ່ຈະນຳໃຊ້ກົນໄກການຄ້າທາງອອນໄລມາໃຊ້ ຕ້ອງໄດ້ທົບທວນ ແລະ ປັບປຸງໜ່ວຍງານທີ່ຈະມີສ່ວນຮ່ວມ ຫຼື ໄດ້ຜົນປະໂຫຍກຫຼັກ. ຂົງເຂດທີ່ຕ້ອງໄດ້ມີການປັບປຸງຮູບແບບການເຮັດການຄ້າທາງອອນໄລປະກອບມີດັ່ງນີ້:[signinlocker]
- ຄວນມີຍຸດທະສາດ ແລະ ທິດທາງການປັບປຸງ E-Business
ຍຸດທະສາດຈະປະກອບເອົາທຸກໆເປົ້າໝາຍ ແລະ ສິ່ງທີ່້ອງໄດ້ປະຕິບັດຮ່ວມກັນ. ປຽບສະເໜືອນແຜນແມ່ບົດໃນການເຮັດວຽກເປັນທີມ. ປາດສະຈາກຍຸດທະສາ, ກໍ່ຈະເຮັດໃຫ້ມີການກວດສອບປະສິດທິຜົນການເຮັດວຽກທີ່ສັບສົນໃນຕໍ່ໜ້າ. ຍຸດທະສາດຈະເປັນການສ້າງຄວາມສຳເລັດໃນການລິເລີ້ມ E-Business ໃນໄລຍະສັ້ນແລະຍາວ.
ຍຸດທະສາດຈະບັນຈຸໜ້າວຽກຂອງແຕ່ລະພາກສ່ວນ. ນັບແຕ່ສູງຫາພະນັກງານວິຊາການ. ສິ່ງດັ່ງກ່າວຈະເປັນການມອບໝາຍໜ້າທີ່ຮັບຜິດຊອບຢ່າງລະອຽດເພື່ອສົ່ງເສີມໃຫ້ມີການຈັດຕັ້ງປະຕິບັດຢ່າງຈິງຈັງ. ນອກນັ້ນ, ແຜນຍຸດທະສາດທາງອອນໄລ ຈະເປັນການສ້າງລະບົບການເຮັດວຽກທີ່ແນ່ນອນ, ກວດສອບໄດ້ ແລະ ສ້າງການເຝິກອົບຮົມຄວາມສາມາດຂອງພະນັກງານໃນແຕ່ລະພາກສ່ວນໃຫ້ໄດ້ເພີ່ມຂີດຄວາມສາມາດໃນການເຮັດວຽກງານຮ່ວມກັນໄດ້ຢ່າງມີປະສິດທິຜົນ. ແຕ່ລະໄລຍະ, ທີມວານສາມາດກວດສອບຄວາມຄືບໜ້າ ແລະ ສິ່ງທີ່ແຕ່ລະໜ່ວຍງານບັນລຸຜົນ, ຄ້າງຄາ ຫຼື ຕ້ອງໄດ້ປ່ຽນກົນໄກໃໝ່. ຍຸດທະສາດການຄ້າທາງອອນໄລທີ່ປະສົບຜົນສຳເລັດມັກມີລັກສະນະດັ່ງຕໍ່ໄປນີ້:
- ຍຸດທະສາດມີສາຍພົວພັນກັບຈຸດປະສົງລວມຂອງບໍລິສັດ, ຕອບສະໜອງຄວາມຕ້ອງການຂອງລູກຄ້າ, ແລະ ສົ່ງເສີມການເຮັດທຸລະກິດໃຫ້ມີການຂະຫຍາຍຕົວ,
- ຍຸດທະສາດຕ້ອງສາມາດປັບປ່ຽນເປັນປະຈຳເພື່ອຊ່ວຍໃຫ້ອົງການສາມາດພັດທະນາໄດ້ຕາມເປົ້າໝາຍລວມ, ຮັກສາຍອດຂາຍ, ແຂ່ງຂັນກັບຄົນອື່ນໄດ້, ເຮັດໃຫ້ທີມງານເຮັດວຽກໄດ້ດີຂື້ນ.
- ຮັບຄຳຄິດເຫັນຂອງຄົນພາຍໃນທີມງານ
ຄວາມສຳເລັດຈະເກີດຂື້ນກໍ່ຕໍ່ເມື່ອພາຍໃນທີມງານຮ່ວມກັນຈັດຕັ້ງປະຕິບັດ ແລະ ມີຄວາມເຂົ້າໃຈໃນທຸກໆວຽກງານ. ປະຕິກິລິຍາຂອງບັນດາທີມງານໃນອົງການຈັດຕັ້ງຕໍ່ກັບແຜນຍຸດທະສາດການຄ້າທາງອອນໄລຈະຊ່ວຍປັບປຸງໃຫ້ແຜນມີຄວາມສຳເລັດຼາຍຂື້ນ. ຍິ່ງເປີດໃຫ້ບັນດາຜູ້ມີສ່ວນຮ່ວມມີຄຳເຫັນໃນການປັບປຸງແຜນຍຸດທະສາດ, ຈະເຮັດໃຫ້ສ້າງຄວາມເຂົ້າໃຈໃນການເຮັດວຽກ, ມີຄວາມສາມັກຄີ ແລະ ສ້າງລະບົບຄຸ້ມຄອງທີ່ແຂ່ງແກ່ນ. ໃນທີ່ສຸດ, ກໍ່ຈະເປັນການສ້າງຜົນປະໂຫຍດທີ່ດີທີ່ສຸດໃຫ້ແກ່ລູກຄ້າຂອງບໍລິສັດ.
- ປັບປຸງລະບົບແລກປ່ຽນຂ່າວສານພາຍໃນຜ່ານທາງລະບົບເຕັກໂນໂລຢີ່
ຢ່າງໜ້ອຍ, ລະບົບການຄ້າທາງອອນໄລ ຊ່ວຍພັກດັນໃຫ້ພະນັກງານສາມາດນຳໃຊ້ເຄື່ອງມືສື່ສານທາງອອນໄລໃນຫຼາກຫຼາຍຮູບແບບ. ເປັນຕົ້ນນຳໃຊ້ E-Mail, ເວັບໄຊໂຄສະນາກິດຈະກຳ, ໃຊ້ສື່ສັງຄົມອອນໄລແຈ້ງຂ່າວສານ, ສົ່ງຂໍ້ມູນໃໝ່ກ່ຽວກັບຜະລິດຕະພັນ ແລະ ການບໍລິການໃຫ້ແກ່ລູກຄ້າ. ນອກນັ້ນ, ຍັງຈະພັກດັນໃຫ້ມີການນຳໃຊ້ຄອມພີວເຕີ້ຕັ້ງໂຕະ ແລະ ເຄື່ອນທີ່, ມືຖື ແລະ ອື່ນໆ ເພື່ອດຳເນີນທຸລະກິດ ຫຼື ໃນວຽກງານບໍລິຫານປະຈຳວັນ.
- ປັບປ່ຽນວັດທະນະທຳການເຮັດວຽກ
ໃນນະວັດຕະກຳການສື່ສານອອນໄລ, ຈະພັກດັນໃຫ້ບັນດາທີມງານຕ້ອງໄດ້ຫັນປ່ຽນການນຳໃຊ້ເຄື່ອງສື່ສານທນສະໄໝ. ຫາກການນຳລຸ້ນອາວຸໂສ, ທາງທີມງານກໍ່ຕ້ອງໄດ້ພັກດັນການຮຽນຮູ້ຂັ້ນພື້ນຖານ ເພື່ອສາມາດໄປຕາມຂະບວນການຂອງບໍລິສັດ. ເປັນຕົ້ນ, ການສົ່ງເອກະສານເຊີນ ບໍ່ຈຳເປັນຕ້ອງສົ່ງໃນຮູບແບບຈົດໝາຍ, ບັນດາທີມງານທຸກໆລະດັບ ຄວນສາມາດສື່ສານທາງອີເມວໃນການແຈ້ງປະຊຸມ ແລະ ຮັບຕອບການເຊີນ. ການເຮັດວຽກດັ່ງກ່າວຈະສ້າງວິທີການເຮັດວຽກທີ່ວ່ອງໄວ, ການແຈ້ງຂ່າວສານທັນການ ແລະ ສ້າງການຕັດສິນໃຈທີ່ທັນການ.
ທັງ 04 ອົງປະກອບທີ່ທາງບໍລິສັດ ຄວນພິຈາລະນາໃນການນຳເອົາການຄ້າທາງອອນໄລເພື່ອມາຜັນຂະຫຍາຍໃນບໍລິສັດ. ການປ່ຽນແປງຂະບວນການດັ່ງກ່າວ: ຈະເຮັດໃຫ້ໄດ້ຮັບຜົນໃນວົງກວ້າງສຳລັບວັດທະນະທຳທີ່ມີຢູ່ ໃນປະຈຸບັນ, ເຊັ່ນວ່າ: ກົດລະບຽບ, ຄວາມເຊື່ອ, ຫັຼກການ ແລະ ພຶດຕິກຳທີ່ອົງການເຄີຍປະຕິບັດມາ. ເພື່ອບັນລຸຈຸດປະສົງຂອງບໍລິສັດ, ເສີມສ້າງຄວາມຫຼາກຫຼາຍຂອງຂ່າວສານ. ໃນຂະນະດຽວກັນມັນກໍ່ເພີ່ມໂອກາດໃຫ້ທຸລະກິດຂອງທ່ານອອກສູ່ສາຍຕາ ມະຫາຊົນ ແລະ ພັກດັນໃຫ້ການຄ້າມີການໂຕ້ຕອບແລກປ່ຽນນຳກັນຫລາຍຂຶ້ນ ແລະ ໄວຂື້ນ.
Viengsombath Bangonesengdet Editor in chief
ຊ່ວຍສ້າງສັນສິງເປັນປະໂຫຍດແກ່ສັງຄົມ. ມີຄວາມສາມາດທີ່ມາຈາກປະສົບການ ແລະ ການສຶກສາ ຕິດພັນກັບຂົງເຂດ: ຍຸດທະສາດການບໍລິຫານ, ການຕະຫຼາດ, ການວາງແຜນທຸລະກິດ, ການຄ້າ ທາງອອນໄລ, ນະໂຍບາຍບຸກຂະລາກອນ, ປັບປຸງອົງການຈັດຕັ້ງ, ການສ້າງຍີ່ຫໍ້ສິນຄ້າ ແລະ ສອນ ເຕັກນິກການນຳພາ. ທ່ານສາມາດ ໃຊ້ບໍລິການພິເສດ ຫຼື ຕິດຕາມເຕັກນິກຜ່ານທາງເວັບໄຊນີ້.
