ຄວາມຮັກເຮັດໃຫ້ຄົນຕາບອດ. ໄດ້ຍິນຄຳນີ້ມານັບບໍ່ຖ້ວນ. ນິຍາມຂອງຄວາມຮັກນັ້ນມີຫຼາຍ ແລະ ສາເຫດຂອງການຕົກຫຼຸມຮັບກໍ່ມີຫຼາຍໆນັກວິໄຈໄດ້ເຮັດມາ. ຈຸດເລີ່ມຕົ້ນຂອງຄວາມຮັກສອງຄົນ ໜ້າຈະແມ່ນຕອນແຕ່ງດອງ.
ຄວາມຈະເລີນຂອງຊາດ ມາຈາກຄອບຄົວເປັນສ່ວນໃຫຍ່ຄືກັນ. ຄວາມອົບອຸ່ນ ແລະ ປອງດອງຂອງຄອບຄົວເປັນການສ້າງໃຫ້ເດັກນ້ອຍມີໂອກາດທາງສັງຄົມ. ສະຖາບັນຄອນຄົວ ເປັນຈຸດກຳເນີດຂອງບຸກຂະລາກອນ ແລະ ມວນມະນຸດ. ການພັດທະນາຄອບຄົວ ເປັນຈຸດເລີ່ມຕົ້ນຂອງການສິດສອນຜູ້ໃຫຍ່ທີ່ດີໃນຕໍ່ໜ້າ.
ຂ້າພະເຈົ້າດີໃຈເວລາມີຄົນນັ້ນຄົນນີ້ຍອມບໍ່ເປັນໂສດ. ຫຼາຍໆຄົນທີ່ເຂົ້າຮ່ວມງານຕ່າງອ່ວຍພອນ ແລະ ຊື່ນຊົມຕໍ່ກັບສາຍສຳພັນຮັກທີ່ທັງສອງມີ. ຖ້າຈະເວົ້າເລື່ອງໂຊກສະຕາແລ້ວເປັນສິ່ງທີ່ເບິ່ງບໍ່ເຫັນ. ການແຕ່ງງານກໍ່ເປັນການສ່ຽງໂຊກ. ຫຼາຍຄົນມີບັນຫາຫຼັງແຕ່ງງານຫຼາຍກວ່າເວລາເປັນໂສດ ແລະ ກົງກັນຂ້າມຫຼາຍໆຄູ່ຢູ່ນຳກັນຈົນວັນສຸດທ້າຍຄ້າຍຄືວັນທຳອິດທີ່ຕົກຫຼຸມຮັກ. ຂ້າພະເຈົ້າເປັນຄົນສະຫຼອກກອກໜ້ອຍໜຶ່ງ, ໄປລັກອ່ານເຄັດລັບຄວາມຮັກ ແລະ ລັກສັງເກດຈາກຄູ່ຈິງ ແລ້ວນຳມາເລົ່າສູ່ທ່ານຝັງ. ໃນງານແຕ່ງງານ ມັກຈະໄດ້ຍິນຄຳວ່າ “ຂໍໃຫ້ຖືໄມ້ຖ້າວຍອດທອງ, ກະບອງຍອດເພັດ” ຫຼັງງານສີ້ນສຸດສົງ, ເປັນໜ້າທີ່ຂອງທັງສອງທີ່ຈະຕ້ອງໄດ້ປະຄອງຊີວິດ ແລະ ຄູ່ທີ່ມີຊີວິດຄູ່ແບບຍືນຍາວ , ມີຄວາມສຸກ, ມີສຽງຫົວ, ມີຮອຍຍີ້ມ, ມັກຈະມີລັກສະນະຄື:
- ເພື່ອນທີ່ດີ
ສະເໜ່ຫາຄວາມຮັກບໍ່ອາດມີໄດ້ຕະຫຼອດ. ຄວາມເປັນເພື່ອນມິດ ເປັນສິ່ງສຳຄັນ ເພາະສາຍສຳພັນແບບເພື່ອນມິດຈະເຮັດໃຫ້ຄູ່ຮັກ ມັກໃຊ້ເວລາຮ່ວມກັນ ເພື່ອສ້າງກິດຈະກຳ. ໃນເວລາເປັນໂສດ ເຮົາກໍ່ມັກຈະເລືອກເພື່ອນມິດທີ່ສາມາດລົມກັນໄດ້ ແລະ ມີລັກສະນະທີ່ໄປນຳກັນໄດ້. ມີຫຼາຍໆກິດຈະກຳທີ່ຄູ່ຮັກຈະໄດ້ໃຊ້ເວລາຮ່ວມກັນ ເພື່ອສ້າງກິດຈະກຳໃນເວລາຫວ່າງ. ຖ້າຫາກສິ່ງທີ່ຮ່ວມກັນເຮັດນຳກັນສ່ວນໃຫຍ່ ເປັນສິ່ງໜ້າເບື່ອໜ່າຍຂອງອີກຝ່າຍແລ້ວ, ອາດເຮັດໃຫ້ມີໂອກາດຫ່າງເຫີນກັນຫຼາຍຂື້ນ.
- ແຂກຄົນສຳຄັນ
ເວລາມີແຂກເຂົ້າບ້ານ, ເຈົ້າຂອງຈະຮັບຕ້ອນແຂກເຕັມທີ່. ມີຫຍັງກໍ່ຫາມາໃຫ້ກິນ ເຊັ່ນ: ນ້ຳ, ອາຫານ, ເປີດແອໃຫ້ ແລະ ລົມແຕ່ແນວມ່ວນໆ. ຖ້າຫາກປະຕິບັດຕໍ່ກັບຄູ່ຮັກ ຄືກັບແຂກຄົນພິເສດແລ້ວ ແນ່ນອນຈະເຮັດໃຫ້ຄູ່ຮັກຂອງເຮົາຮູ້ສຶກເປັນພິເສດ. ບໍ່ຈຳເປັນສິ່ງຂອງມີຄ່າ ຫຼື ການເອົາໃຈໃສ່ທີ່ພິດສະດານ ແຕ່ຄຳເວົ້າ ແລະ ການໂອ້ລົມແບບເປັນມິດ ຈະຊ່ວຍສ້າງຄວາມຮູ້ສຶກໂອບອ້ອມອາລີ ແລະ ທັງຍັງເປັນການສະແດງຄວາມເປັນຫວ່ງເປັນໃຍໄດ້ຕະຫຼອດເວລາ.
- ເປີດເອິກຫາກັນ
ຢ່າຄິດໄປໃກເທື່ອເດີ. ຄຳວ່າເປີດເອິກເຂົ້າຫາກັນ ແມ່ນການ ສ້າງການສົນທະນາ ແບບຈິງໃຈ ໃນຍາມທີ່ມີສິ່ງບໍ່ສອດຄ່ອງເກີດຂື້ນ. ທັງສອງຄວນມີເວລາ ມາລົມກັນຫຼາຍໆບັນຫາຄອບຄົວ ເຊັ່ນ: ການເງິນ, ວຽກງານ, ລູກ ແລະ ພີ່ນ້ອງ. ແນ່ນອນ ບໍ່ຄວນເວົ້າບັນຫາແຕ່ຢ່າງດຽວ ຄວນຮ່ວມກັນຊອກທາງແກ້ໄຂ ແລະ ຈັດຕັ້ງປະຕິບັດຮ່ວມກັນ. ທັງນີ້ກໍ່ເນື່ອງຈາກວ່າ ທັງສອງໄດ້ຮ່ວມຊີວິດກັນແລ້ວ ດັ່ງນັ້ນ ການປຶກສາຫາລືຈິ່ງເປັນຫົນທາງໃນການຮ່ວມກັນຄິດ ແລະ ແກ້ໄຂ. ເຫັນຫຼາຍໆຄູ່ ຈະມີການວາງແຜນ ແລະ ເຮັດຮ່ວມກັນ ເຊັ່ນ: ແຜນຊື້ບ້ານ, ແຜນມີລູກ ແລະ ອື່ນໆ. ກິດຈະກຳດັ່ງກ່າວ ເຮັດໃຫ້ທັງສອງມີຫຼາຍໆແນວຮ່ວມກັນເຮັດ.
- ເປັນສ່ວນຕົວ
ແນ່ນອນ ເຖິງວ່າຈະແຕ່ງດອງກັນ ແລະ ມີຫຼາຍໆເປົ້າໝາຍຮ່ວມກັນ ແຕ່ຫຼາຍໆຄົນກໍ່ຍັງມີເປົ້າໝາຍສະເພາະຂອງໃຜມັນ. ເຊິ່ງເປັນສິ່ງທີ່ເຂົາເຈົ້າຕ້ອງພະຍາຍາມບຸກບືນໃຫ້ໄດ້ມາ. ການສະໜັບສະໜູນ ກິດຈະກຳທີ່ເປັນຊີວິດສ່ວນຕົວ ຈະເຮັດໃຫ້ມີໂອກາດໄດ້ເຂົ້າໄປຮູ້ຈິດວິນຍານ ແລະ ແຮງບັນດານໃຈຂອງຄູ່ຮັກຫຼາຍຂື້ນ. ທັງຍັງເຂົ້າໃຈແຮງປາດຖະໜາ ແລະ ສິ່ງຄາດຫວັງຈາກສ່ວນຕົວ. ການເຂົ້າມີສ່ວນຮ່ວມຂອງຄົນຮັກຈະເຮັດໃຫ້ໃກ້ຊິດກັນດ້ານແນວຄວາມຄິດຫຼາຍຂື້ນ.
- ແຕກຕ່າງແຕ່ບໍ່ແຕກແຍກ
ຫຼາຍຄູ່ມີຈຸດຄ້າຍຄືກັນຫຼາຍ. ບາງຄັງຮອດໜ້າຕາ ຫຼື ທ່າທາງທີ່ຄ້າຍໆກັນ. ແຕ່ການເຂົ້າໃຈ ແລະ ເຫັນຈຸດແຕກຕ່າງນັ້ນ ເປັນສິ່ງທີ່ຕ້ອງໄດ້ສຶກສາ. ຄັນບໍ່ຊັ້ນແລ້ວຈະມີການຕຳນິ ແລະ ໃນທີ່ສຸດກໍ່ບໍ່ຍອມຮັບ. ຫຼາຍໆຄູ່ ເບິ່ງສິ່ງທີ່ຄ້າຍຄືກັນ ນັ້ນເປັນຈຸດຕັດສິນແຕ່ງ ແລະ ປະຕິດເສດ ຫຼື ບໍ່ຮັບຮູ້ຄວາມແຕກຕ່າງ. ແລ້ວທີ່ມັກເຫັນກໍ່ຄືພະຍາຍາມປ່ຽນພຶດຕິກຳ ທີ່ຫຼາຍໆຄົນອາດບໍ່ສາມາດປ່ຽນໄດ້ ເພາະເຂົາເຈົ້າອາດເປັນແນວນັ້ນມາແຕ່ເກີດ. ຖ້າຫາກຄວາມແຕກຕ່າງ ບໍ່ໄດ້ກໍ່ໃຫ້ມີຜົນເສຍດ້ານລົບ ແຕ່ອາດຈະເປັນການບໍ່ມັກສ່ວນຕົວແລ້ວ ກໍ່ບໍ່ຄວນບັງຄັບໃຫ້ປ່ຽນແປງ ເພາະອາດກໍ່ໃຫ້ເກີດມີຄວາມແຕກແຍກ ຫຼື ໃນທີ່ສຸດກັບກາຍເປັນການເບິ່ງໃນຈຸດດ້ອຍຂອງຄູ່ຄອງ. ໃນເວລາຮັກຄົນເຮົາຈະເຫັນແຕ່ຈຸດດີໆ ຫຼື ຮັບໄດ້ໝົດ ແລະ ເວລາແຕ່ງກັນໄປແລ້ວ ຖ້າບໍ່ສາມາດປະຕິບັດສິ່ງນີ້ໄດ້ ອາດກັບກາຍເປັນຈຸດຈົບຂອງຊີວິດຄູ່.
ຫາກຕ້ອງໄດ້ສັງລວມພຶດຕິກຳຂອງຄົນຮັກທີ່ຢູ່ນຳກັນ ຈົນຊົ່ວຊີວິດ ນັ້ນ: ຄວາມເອື້ອອາທອນ ເປັນລັກສະນະທີ່ໜ້າຈະຮັກສາຊີວິດຄູ່ໄດ້. ຄວາມອາທອນ ເປັນການສະແດງ ຄວາມຫວ່ງໃຍ, ຄວາມອີດູຕົນ, ຄວາມເພື່ອແຜ່, ແລະ ຄວາມຮັກ. ເຮົາອາດຈະບໍ່ລະເມີຫາຄົນຮັກຄືກັນກັບມື້ທຳອິດທີ່ຕົກຫຼຸມຮັກ ແຕ່ຄວາມອາທອນເປັນຄວາມຮູ້ສຶກເຂົ້າໃຈ ແລະ ມີຄວາມຮູ້ສຶກຄືກັນກັບຄົນທີ່ເຮົາຮັກກຳລັງສູດລົມຫາຍໃຈໃນເວລາເຈັບເປັນ, ຕົກທຸກ, ແລະ ມີບັນຫາ.
Viengsombath Bangonesengdet Editor in chief
ຊ່ວຍສ້າງສັນສິງເປັນປະໂຫຍດແກ່ສັງຄົມ. ມີຄວາມສາມາດທີ່ມາຈາກປະສົບການ ແລະ ການສຶກສາ ຕິດພັນກັບຂົງເຂດ: ຍຸດທະສາດການບໍລິຫານ, ການຕະຫຼາດ, ການວາງແຜນທຸລະກິດ, ການຄ້າ ທາງອອນໄລ, ນະໂຍບາຍບຸກຂະລາກອນ, ປັບປຸງອົງການຈັດຕັ້ງ, ການສ້າງຍີ່ຫໍ້ສິນຄ້າ ແລະ ສອນ ເຕັກນິກການນຳພາ. ທ່ານສາມາດ ໃຊ້ບໍລິການພິເສດ ຫຼື ຕິດຕາມເຕັກນິກຜ່ານທາງເວັບໄຊນີ້.
