ຖ້າທ່ານບໍ່ຮູ້ວ່າໃຜຄືຄົນສຳຄັນ, ທ່ານກໍ່ຈະເສຍເວລາກັບຄົນທີ່ບໍ່ສຳຄັນ.ຈົ່ງຮູ້ວ່າໃຜຄືຄົນທີ່ມີຄ່າທີ່ສຸດ ແລະ ຫາເວລາຢູ່ກັບພວກເຂົາຢ່າງເຕັມທີ່. ທຸກໆຄົນມີເວລາ 24 ຊົ່ວໂມງຊຳກັນ. ເມື່ອໃດທ່ານໃຊ້ກັບຄົນທີ່ບໍ່ເຫັນຄ່າຂອງທ່ານ, ເມື່ອນັ້ນທ່ານເສຍເວລາໂດຍບໍ່ມີປະໂຫຍດ. ເຊັ່ນດຽວກັນກັບການເຮັດໜ້າທີ່. ເມື່ອທ່ານຮູ້ອັນໃດເປັນວຽກງານສຳ ຄັນສຳຄັນ, ທ່ານຈະຍອມທຸ້ມເທໃນການສ້າງສິ່ງນັ້ນໃຫ້ເກີດຂື້ນມາໄດ້.
ຄວາມສຸກຄືສິ່ງທີ່ທ່ານສາມາດເລືອກເອງໄດ້. ທ່ານຄວນຕັ້ງຄວາມຫວັງ ໃຫ້ຕົວເອງມີຄວາມສຸກຫລາຍກວ່າທີ່ເຄີຍມີໃນວັນຜ່ານໆມາ. ມັນບໍ່ແມ່ນເລື່ອງຫນ້າແປກໃຈຫາກທ່ານຈະເຫັນຕົນເອງມີຄວາມສຸກ. ຫຼາຍຄົນທີ່ເປັນທຸກ ເປັນຍ້ອນເພາະເຂົາຄິດວ່າ: ຄວາມສຸກຄືທາງເລືອກທີ່ພວກເຂົາບໍ່ເຄີຍເລືອກ. ເມື່ອໃດເຮົາບໍ່ເອົາຕົນເອງໄດ້ຕິດຢູ່ໃນຮູບແບບເກົ່າແລະເລື່ອງບໍ່ດີທີ່ທ່ານພົບພໍ້ມາໃນອາດີດ, ສິ່ງບໍ່ດີກໍ່ຈະບໍ່ແຊກຊຶມເຂົ້າໄປໃນຊີວິດ ແລະ ກັດແຫ້ນຄວາມ ສຸກໃຫ້ຫາຍໄປ. ບໍ່ເວັ້ນແມ້ແຕ່ເລື່ອງເຈັບປວດ ເລື່ອງທີ່ຄວນໃຫ້ອະໄພກໍປົງຫລືປ່ອຍວາງບໍ່ໄດ້. ພວກເຮົາບໍ່ຄວນທົນໃຊ້ຊີວິດກັບຄວາມທຸກ ຫລື ສິ່ງຫນ້າເບື່ອແບບທີ່ເຄີຍພົບມາໃນທຸກວັນ.
ເພື່ອໃຫ້ຄົນທີ່ເຮົາຮັກເປັນສຸກ ຫຼື ສະບາຍໃຈ, ຫຼາຍຄົນຫລອກຕົວເອງ ແລະ ຕົວະຄົນອື່ນວ່າຕົນຍັງສະບາຍດີທັ້ງທີ່ພາຍໃນໃຈເລິກໆຂອງພວກເຂົາປາຖະຫນາສິ່ງທີ່ແຕກຕ່າງ ກວ່າວັນນີ້. ສ່ວນເລິກໆໃນຫົວໃຈ, ອາດຄິດເຖິງສິ່ງທີ່ ຢາກເຮັດ ແລະ ທຸ້ມເທ, ສະຖານທີ່ຕ້ອງການໄປ, ວຽກງານທີ່ຕົນເອງຕ້ອງການຢາກເຮັດ ແລະ ຄົນທີ່ຢາກໃຊ້ເວ ລານຳ. ເມື່ອໃດທ່ານເລີ່ມ ຄິດເຫັນສິ່ງດັ່ງກ່າວໃນຈິດສຳນຶກ, ໝາຍວ່າຕອນນີ້ ຍັງມີໂອກາດໃຊ້ຊີວິດໄປຕາມທາງທີ່ ທ່ານຕ້ອງການ. ແນ່ນອນ ທ່ານອາດບໍ່ສາມາດເຮັດໄດ້ໃນຊົ່ວພິບຕາ, ຢ່າງນ້ອຍໆກໍ່ເຊື່ອວ່າ ແນວຄິດຈະເປັນຫົນທາງ ພາທ່ານອອກສູ່ ເສັ້ນທາງ ທີ່ທ່ານຕ້ອງການໄປເຖິງຈຸດໝາຍ.
ໃນບາງສະຖານະການ, ທ່ານອາດຢ້ານຄຳເຫັນຂອງຄົນອື່ນ. ຫາກເຮົາໃສ່ໃຈຄຳເວົ້າຂອງເຂົາເຈົ້າຫຼາຍເກີນໄປ ຈະເຮັດ ໃຫ້ທ່ານຕ້ອງ ລະເລີຍວຽກງານ ແລະ ສິ່ງທີ່ທ່ານຕ້ອງການເຮັດ. ເປັນໄປໄດ້ຍາກສຳລັບບາງກໍລະນີ ຖ້າກິດຈະກຳ ຂອງທ່ານ ຕິດພັນກັບຫຼັກເກນ ຂອງຊົນຊັ້ນ, ສາດສະໜາ ຫຼື ວັດຖະນະທຳ ທາງສັງຄົມ. ທ່ານຈະຕ້ອງໄດ້ໃຊ້ຍຸດ ທະວິທີ ແລະ ຫົວຄິດ ໃນການທີ່ຈະດຳເນີນຊີວິດ ນອກຂີດຈຳກັດຂອງສັງຄົມ.
ຄຳຄິດເຫັນຄົນອື່ນກະສຳຄັນໃນຊີວິດຄົນເຮົາຄືກັນ. ເຮົາຄວນນຳມາປັບປຸງ ແທນການຢຸດເຮັດວຽກງານ ຫຼື ດຳລົງ ຊີວິດທີ່ທ່ານຕ້ອງການ. ນະວັດຕະກຳ ໃນການສ້າງສິນຄ້າໃໝ່ ເປັນຕົ້ນ ລົດ, ຍົນ, ດອກໄຟ, ຄອມພີວເຕີ້ ແລະ ອື່ນໆ ຕ່າງໄດ້ຮັບຄຳຫົວຂັວນເຍາະເຍີ້ຍ ຈາກຄົນໃນສັງຄົມ. ແລ້ວກັບມາຖາມເບິ່ງວ່າ ສິ່ງທີ່ທ່ານເຮັດແລ້ວເປັນສຸກ ອັນຈະ ນຳຜົນປະໂຫຍດມາສູ່ສັງຄົມ ກໍ່ໜ້າຈະເປັນໄປໄດ້ ຫາກທ່ານສືບຕໍ່ດຳເນີນຢ່າງມີແນວຄິດ.
ເພາະຄົນອື່ນຄິດວ່າເປັນໄປບໍ່ໄດ້, ບໍ່ໄດ້ໝາຍວ່າທ່ານຈະເຮັດບໍ່ໄດ້. ເມື່ອໃດທ່ານຍອມຮັບເອົາແນວຄິດເຫຼົ່າ ນັ້ນເຂົ້າ ມາ, ພວກເຮົາກໍ່ຈະສູນເສຍຊີວິດ ທີ່ທ່ານຕ້ອງການມີ. ດັ່ງນັ້ນ, ຈົ່ງເຫັນແກ່ຕົວ. ເລືອກຄວາມສຸກຈາກການ ໄດ້ເຮັດ ໃນສິ່ງທີ່ທ່ານມັກ ແລະ ໄດ້ຢູ່ກັບຄົນທີ່ທ່ານຮັກ. ຈັດລຳດັບຄວາມສຳຄັນໃຫ້ຕົວເອງ ແລະ ສິ່ງເຫຼົ່ານັ້ນຢູ່ເປັນອັນດັບຕົ້ນໆຂອງການມີຊີວິດໃນແຕ່ລະວັນ. ການດຳລົງຊີວິດແນວນັ້ນ, ຈະຍິ່ງນຳພາຕົວເອງສ້າງຄວາມຊົງຈຳທີ່ດີ ໃນຊ່ວງ ການມີຊີວິດບົນໜ້າໂລກ. ຄວາມຝັນຂອງເຮົາສາມາດເປັນຈິງໄດ້ ຖ້າເຮົາມີຄວາມກ້າຫານພໍທີ່ຈະໄລ່ຕາມຄວາມຝັນ. ຖ້າທ່ານສາມາດຝັນໄດ້ທ່ານຈະເຮັດໄດ້.
Viengsombath Bangonesengdet Editor in chief
ຊ່ວຍສ້າງສັນສິງເປັນປະໂຫຍດແກ່ສັງຄົມ. ມີຄວາມສາມາດທີ່ມາຈາກປະສົບການ ແລະ ການສຶກສາ ຕິດພັນກັບຂົງເຂດ: ຍຸດທະສາດການບໍລິຫານ, ການຕະຫຼາດ, ການວາງແຜນທຸລະກິດ, ການຄ້າ ທາງອອນໄລ, ນະໂຍບາຍບຸກຂະລາກອນ, ປັບປຸງອົງການຈັດຕັ້ງ, ການສ້າງຍີ່ຫໍ້ສິນຄ້າ ແລະ ສອນ ເຕັກນິກການນຳພາ. ທ່ານສາມາດ ໃຊ້ບໍລິການພິເສດ ຫຼື ຕິດຕາມເຕັກນິກຜ່ານທາງເວັບໄຊນີ້.
