ຈຸດປະສົງຂອງພາກນີ້ເພື່ອຊ່ວຍໃຫ້ທ່ານສາມາດເຂົ້າໃຈໂຄງຮ່າງໂດຍລວມ ແລະ ການບໍລິຫານທຸລະກິດ. ການສ້າງໂຄງຮ່າງບໍລິຫານງານບໍ່ແມ່ນແຕ່ແຕ້ມຕາມໃຈ. ກັບກາຍເປັນສ້າງລະບົບອຳນາດການສັ່ງງານ ຕາມໜ້າທີ່ ແລະ ຄວາມຮັບຜິດຊອບ. ໂຄງຮ່າງການບໍລິຫານງານກຳນົດລັກສະນະລວມຂອງຄົນໃນທີມທີ່ຢາກໃຫ້ເປັນ.
ໃນເມື່ອທ່ານສຶກສາພາກນີ້ແລ້ວ ທ່ານຈະສາມາດເຂົ້າໃຈບັນຫາດັ່ງນີ້:
1) ການບໍລິຫານແມ່ນຫຍັງ?
2) ຈະມີບາດກ້າວໃດສ້າງທີມງານບໍລິຫານງານທີ່ມີປະສິດທິຜົນ?
3) ສິ່ງທີ່ຄວນໃສ່ໃຈໃນການສ້າງໂຄງຮ່າງການບໍລິຫານງານ
4) ໂຄງຮ່າງການຈັດຕັ້ງຄະນະບໍລິຫານງານຈະເປັນແນວໃດ
5) ແຕ່ລະໜ່ວຍງານຈະມີຄວາມຮັບຜິດຊອບແນວໃດ
ການບໍລິຫານຮັບຜິດຊອບທຸກໆຄວາມສຳເລັດແລະລົ້ມເຫຼວຂອງບໍລິສັດ, ເນື່ອງຈາກເປັນໜ່ວຍງານທີ່ກຳນົດການເຮັດວຽກກິດຈະກຳໃນບໍລິສັດ. ການຮ່ວມຕົວຂອງແຕ່ລະບຸກຄົນ ເພື່ອສູ້ຊົນໃຫ້ໄດ້ມາເປົ້າໝາຍທີ່ວາງໄວ້ຮ່ວມກັນ ຈະເປັນການສ້າງບາດກ້າວສູ່ຄວາມສຳເລັດ ແລະ ທັງຍັງກະຕຸ້ນໃຫ້ບັນດາຄົນທີ່ຢູ່ໃຕ້ບັງຄັບບັນຊາມີຄວາມຕັ້ງໃຈເຮັດວຽກເ່ອໃຫ້ໄດ້ຕາມເປົ້າໝາຍຂອງບໍລິສັດວາງໄວ້.
ການບໍລິຫານຄືການໃຫ້ການຊີ້ນຳ-ນຳພາແກ່ກຸ່ມ.
ທ່ານຈະຕ້ອງລວມເອົາທຸກໆລາຍລະອຽດຂອງຕຳແໜ່ງບໍລິຫານພ້ອມທັງປະຫັວດຫຍໍ້ຂອງເຂົາເຈົ້າກ່ຽວກັບປະສົບການ ແລະ ຄວາມສາມາດ ຫຼື ອະທິບາຍຄວາມສາມາດທີ່ກ່ຽວຂ້ອງກັບວຽກງານທີ່ກຳລັງດຳລົງຕຳແໜ່ງດັ່ງກ່າວ.
ສຳລັບແຕ່ລະຄົນທີ່ດຳລົງຕຳແໜ່ງ ຈຳເປັນຕ້ອງໄດ້ໃຫ້ລາຍລະອຽດ, ກ່ຽວກັບປະສົບການທີ່ດຳເນີນງານງານມາກ່ອນໜ້ານີ້, ຄວາມເປັນມືອາຊີບໃນແຕ່ລະຂົງເຂດວຽກງານ ແລະ ຂະແໜງການ. ລວມທັງໝາກຜົນທີ່ໄດ້ຮັບ ເປັນຕົ້ນແມ່ນລາງວັນຕ່າງໆໃນຂະບວນການເຮັດວຽກຜ່ານມາ.
ການບັນຍາຍດັ່ງກ່າວຈະເປັນການເພີ່ມຄວາມໜ້າເຊື່ອຖືໃຫ້ແກ່ນັກລົງທຶນ ຫຼື ທະນາຄານທີ່ທ່ານຕ້ອງການເຂົ້າຫາເງິນກູ້ ແລະ ໃຮເວລາດຽວກັນກໍ່ຈະເປັນການສະແດງໃຫ້ເຫັນທ່າແຮງ ແລະ ຈຸດອ່ອນຂອງທີມບໍລິຫານງານ. ເພື່ອໃຫ້ສາມາດສືບຕໍ່ພັດທະນາໄດ້ໃນຕໍ່ໜ໊າ, ຈຳເປັນຕ້ອງໄດ້ໃຫ້ລາຍລະອຽດກ່ຽວກັບໜ້າທີ່ຮັບຜິດຊອບ ແລະ ສິດໃນການເຮັດວຽກຂອງສະມາຊິກບໍລິຫານງານແຕ່ລະຄົນໃນອົງການຈັດຕັ້ງ ຜູ້ທີ່ຈະເຮັດວຽກງານບໍລິຫານ ແລະ ເປັນເງື່ອນໄຂໃນການກຳນົດເງີນຈ້າງງານໃນແຕ່ລະຕຳແໜ່ງ.
ທ່ານຕ້ອງໄດ້ກຳນົດ:
- ກຸ່ມໜ້າວຽກທີ່ຈະຖືກສ້າງຂື້ນໃນບໍລິສັດຂອງທ່ານ
- ໜ້າທີ່ຂອງແຕ່ລະກຸ່ມໜ້າວຽກທີ່ຈະຕ້ອງໄດ້ເຮັດໃຫ້ສາເລັດ
- ການເຫັນດີຂອງແຕ່ລະຕຳແໜ່ງໃນໜ້າທີ່ວຽກງານ
- ວິທີການຈ້າງງານ
- ປະລິມານຄົນທີ່ຈະເຮັດວຽກໃນແຕ່ລະຕຳແໜ່ງ
- ຊົວໂມງເຮັດວຽກທີ່ຈະຮັບປະກັນການເຮັດວຽກຂອງການຜະລິດ
ເພື່ອເຮັດໃຫ້ອົງການສາມາດດຳເນີນໄປໄດ້ຢ່າງສະດວກ, ຄວນບັນຈຸເອົາທີມງານສະໜັບສະໜູນດ້ານວິຊາການທີ່ຈຳເປັນເພື່ອແກ້ໄຂບັນຫາສະເພາະໜ້າ. ເປັນຕົ້ນ, ພະນັກງານໄອທີ, ຫາກບໍລິສັດຂອງທ່ານຕ້ອງໄດ້ນຳໃຊ້ເຕັກນິກທັນສະໄໝໃນຂົງເຂດສະເພາະດ້ານ.
ທ່ານຄວນແຕ້ມແຜ່ນພາບໂຄງຮ່າງການຈັດຕັ້ງບໍລິສັດຂອງທ່ານ ແລະ ລະບຸຂົງເຂທດທີ່ທ່ານຕ້ອງການໃ້ເຂົາເຈົ້າຮັບຜິດຊອບ, ພ້ອມທັງຊື່ (ຫາກຮູ້ແນ່ນອນ) ໃນຕຳແໜ່ງບໍລິຫານ. ລຸ່ມນີ້, ເປັນຕົວຢ່າງການແຕ້ມແຜນພາບອະທິບາຍໂຄງຮ່າງການຈັດຕັ້ງ ພ້ອມທັງຄຳອະທິບາຍແຕ່ລະຕຳແໜ່ງ
ໂຄງຮ່າງການຈັດຕັ້ງ (ຕົວຢ່າງ)
ໜ້າທີ່ວິຊາສະເພາະ
ການສ້າງຕັ້ງບໍລິສັດຈຳເປັນຕ້ອງໄດ້ເພິງພາຫຼາກຫຼາຍຄວາມສາມາດ, ເປັນຕົ້ນ:
- ການນຳພາ
- ການບໍລິຫານທຸລະກິດ
- ການຕັດສິນໃຈ
- ການບໍລິຫານບຸກຄົນ
- ການສື່ສານພາສາຂຽນ ແລະ ພາສາກາຍ
- ຄວາມສາມາດໃນການສ້າງທີມງານ ແລະ ການສ້າງສາຍສຳພັນກັບພະນັກງານ
ຄວາມສາມາດອື່ນໆທີ່ຈຳເປັນຕ້ອງມີຄື:
- ຫ້າວຫັນ
- ຄວາມຮັບຜິດຊອບ
- ຄ່ອງແຄ້ວ
- ການຄວບຄຸມອາລົມຈິດ
- ຄວາມສາມາດໃນການອອກແບບ, ຈັດຕັ້ງປະຕິບັດ ແລະ ກວດສອບໂຄງການ
ເຈົ້າຂອງທຸລະກິດຄວນມີຄວາມສາມາດດ້ານຜູ້ປະກອບການ, ຈິ່ງເຮັດໃຫ້ເຂົາເຈົ້າສາມາດສານຕໍ່ຄວາມສາມາດດັ່ງກ່າວໃນການເຮັດວຽກງານພາຍໃຕ້ທຸລະກິດຕົວຈິງ. ສິ່ງດັ່ງກ່າວມາຂ້າງເທິງນັ້ນ ເປັນການລະບຸໜ້າທີ່ໃນອົງການຈັດຕັ້ງພາຍໃຕ້ແຜນພາບບໍລິຫານງານຂ້າງເທິງ:
ຄະນະຊີ້ນຳບໍລິສັດ
ແມ່ນບຸກຄົນທີ່ເປັນຕົວແທນຂອງບໍລິສັດ, ຜູ້ທີ່ໃຫ້ທິດທາງລວມໃນການເຮັດວຽກຊີ້ນຳ ແລະຮັບຜິດຊອບຜົນໄດ້ເສຍ.
ຄະນະບໍລິຫານງານ
ໜ້າທີ່ ແລະ ຄວາມຮັບຜິດຊອບ ຂອງຄະນະບໍລິຫານງານມີຫຼາກຫຼາຍ ເຊິ່ງກວມເອົາການບໍລິຫານງານທັງໝົດໃນແຕ່ລະວັນ. ຕຳແໜ່ງດັ່ງກ່າວຈະຕ້ອງໄດ້ຈັດຕັ້ງ, ອອກຄຳສັ່ງ ແລະ ປະສານງານກັບກິດຈະກຳຂອງບໍລິສັດ, ຊອກຫາຫົນທາງໃນການບັນລຸເປົ້າໝາຍຂອງບໍລິສັດ ແລະ ການປັບປຸງທຸລະກິດໃນແຕ່ລະວັນໃຫ້ດີຂື້ນ.
ອຳນວຍການຈະມີໜ້າທີ່ຮັບຜິດຊອບດັ່ງນີ້:
- ສ້າງແຜນການ ແນວຄວາມຄິດປັດສະຍາຂອງທຸລະກິດສ້າງຂື້ນ ແລະ ແນວທາງຂອງທຸລະກິດ ເພື່ອນຳມາສ້າງເປັນເປົ້າໝາຍຂອງທຸລະກິດ
- ການປະສານງານກັບຜູ້ຈັດການຝ່າຍຜະລິດ ເພື່ອສ້າງແຜນດຳເນີນທຸລະກິດ
- ການວິເຄາະ ແລະ ກະຈາຍແນວຄວາມຄິດທຸລະກິດໃຫ້ແກ່ບັນດາຜູ້ບໍລິຫານອື່ນໆຮັບຊາບ ໃນທຸກໆຂອດການ
ບໍລິຫານບຸກຂະລາກອນເພື່ອສ້າງປະສິດທິພາບການເຮັດວຽກທີ່ເໜາະສົມ
- ການບໍລິຫານຄວນແຈ້ງໃຫ້ແກ່ບັນດາຜູ້ຊີ້ນຳໃນແຕ່ລະຂະແໜງການໃນບັນຫາທີ່ມີຄວາມຈຳເປັນແລະຕິດພັນກັບຂົງເຂດທີ່ເຂົາເຈົາຮັບຜິດຊອບ.
- ການວາງແຜນການໃນການອະນຸມັດງົບປະມານ, ບຸກຂະລາກອນ, ການຜະລິດ, ແລະ ປະເພດການບໍລິການທີ່ຈະມີຄວາມຕ້ອງການ.
- ການສ້າງນະໂຍບາຍທີ່ແນ່ນອນ ເພື່ອເປັນຮາກຖານໃນການກ້າວສູ່ຄວາມສຳເລັດ ເຊິ່ງຕ້ອງເລີ່ມຈາກການຈັດຕັ້ງປະຕິບັດທຸກໆວຽກງານທີ່ທ່ານສາມາດຄຸ້ມຄອງໄດ້ເພື່ອຮັບປະກັນວ່າການດຳເນີນທຸລະກິດເປັນໄປຕາມຫຼັກການພື້ນຖານທີ່ກຳນົດໄວ້.
- ຕິດພັນກັບການສ້າງດ້ານກົດລະບຽບຂັ້ນຕອນຕ່າງໆ, ທ່ານຕ້ອງເຮັດໃຫ້ແນ່ໃຈວ່າ ເຂົາເຈົ້າຈະເດີນຕາມທຸກໆພາກສ່ວນໜ້າທີ່ທີ່ໄດ້ຈັດສັນຄວາມຮັບຜິດຊອບໄວ້ລ່ວງໜ້ານີ້.
- ການວິໄຈ ແລະ ຈັດຕັງປະຕິບັດ, ໂດຍການຮ່ວມມືຂອງບັນດານັກບໍລິຫານງານຂອງ ແຕ່ລະໜ່ວຍງານ, ດ້ວຍວິທີທາງທີ່ແນ່ນອນເພື່ອສ້າງການເຮັດວຽກໃຫ້ໄດ້ຕາມ ຈຸດປະ ສົງ, ໂດຍຕ້ອງໄດ້ຄຳນືງວ່າ ແນວທາງ ແລະ ນະໂຍບາຍຂອງບໍລິສັດ ຈະພັກດັນການ ປັບປຸງຜະລິດຕະພັນ.
- ການຈັດນັດພົບກັບບັນດາຜູ້ຈັດການທີ່ຮັບຜິດຊອບວຽກງານໃນແຕ່ລະພາກສ່ວນ ເພື່ອແລກປ່ຽນຂໍ້ມູນໃນການເຮັດວຽກໃນແຕ່ລະໄລຍະວ່າເປັນໄປຕາມເປົ້າທີ່ວາງໄວ້ແລ້ວບໍ່, ປະສານງານຫຼາກຫຼາຍໜ້າທີ່ຮັບຜິດຊອບ, ແກ້ໄຂບັນຫາ ແລະ ສະເໜີແນວທາງແກ້ໄຂໃນແຕ່ລະສະຖານະການ.
ຜູ້ຈັດການຝ່າຍການຜະລິດ ຈະມີໜ້າທີ່ຮັບຜິດຊອບໂດຍກົງໃນການຜະລິດ, ທັງຍັງຮັບຜິດຊອບຕໍ່ໝາກຜົນຂອງຜົວຜະລິດຕະພັນທີ່ອອກມາ. ທຸກໆຂະບວນການຕ່າງໆເປັນຕົ້ນ: ການວາງແຜນ, ການຈັດຕັ້ງ ແລະ ການຄຸ້ມຄອງ ຂອດການຜະລິດໃນແຕ່ລະຈຸດ.
ຜູ້ຈັດການຝ່າຍຜະລິດ ຕ້ອງຮູ້ຈັກການຜະລິດຕົວຈິງຢ່າງມືອາຊີບ ຈະເປັນການດີຫາກຜ່ານການເຝິກອົບຮົມຈາກສະຖາບັນການສຶກສາຊັ້ນສູງ ແລະ ຕ້ອງມີຄວາມສາມາດໃນການຖ່າຍທອດບົດຮຽນໃຫ້ແກ່ພະນັກງານຄົນອື່ນໆ. ໜ້າທີ່ອື່ນໆທີ່ຈຳເປັນມີຄື:
- ກະກຽມການລາຍງານແຜນການ ແລະ ກິດຈະກຳການຜະລິດ ໃຫ້ແກ່ຫົວໜ້າຮັບຊາບເປັນປະຈຳ
- ສະເໜີແຜນວຽກໃນການປັບປຸງຜະລິດຕະພັນແບບໃໝ່ໆ ແລະ ຮັກສາຈຸດປະສົງ-ແນວທາງຂອງບໍລິສັດໃຫ້ດຳເນີນໄປເປັນປົກກະຕິ
- ແນະນຳການຈັດຕັ້ງປະຕິບັດແຜນການຜະລິດ, ການເຮັດວຽກຮ່ວມກັນກັບບັນດາຜູ້ປະສານງານການຜະລິດທຸກໆພາກສ່ວນ.
- ແນະນຳການຈັດຕັ້ງປະຕິບັດໂຄງການ ແລະ ແຜນການຮ່ວມກັບຫຼາຍໆພາກສ່ວນພາຍໃນບໍລິສັດ.
- ເຂົ້າຮ່ວມຂະບວນການຄຸ້ມຄອງ, ປະເມີນຜົນ ແລະ ການຂື້ນແຜນງົບປະມານໂຄງການ ແລະ ການວາງແຜນການການຜະລິດຕໍ່ໆໄປ.
- ການປະສານງານ ແລະ ຮ່ວມກັນກັບພະນັກງານໃນທຸກໆຂົງເຂດ ເພື່ອສ້າງຂະບວນການຜະລິດປະຈຳປີ ໃຫ້ແກ່ຄະນະອຳນວຍການຮັບຮອງ
- ຮັບຜິດຊອບໃນທຸກໆວຽກງານທີ່ໄດ້ຮັບການອະນຸມັດຈາກອຳນວຍການ ໃນການຈັດຕັ້ງປະຕິບັດ, ດຳເນີນງານ ແລະ ປະເມີນຜົນຂອງການຜະລິດປະຈຳປີ
- ປະສານງານກັບກິດຈະກຳການຜະລິດເພື່ອວ່າເຮັດໃຫ້ຮັບຮອງປະສິດທິພາບການຜະລິດສູງ
- ໃຫ້ຄຳແນະນຳແກ່ຜູ້ຈັດການໃນແຕ່ລະຂະແໜງການທີ່ຕິດພັນກັບການຈັດສັນປັດໃຈການຜະລິດ ແລະ ສິ່ງທີ່ມີຄວາມຕ້ອງອື່ນໆນຳໃຊ້ໃນຂະບວນການຜະລິດ
- ແຜນການເຮັດວຽກປະຈຳປີ ແລະ ເອກະສານ ແລະ ວັດຖຸດິບອື່ນໆທີ່ຈຳເປັນໃນຂະບວນການການຜະລິດ
- ກະກຽມແຜນກິດຈະກຳປະຈຳປີໃນແຕ່ລະຂົງເຂດການຜະລິດ ໄວ້ລ່ວງໜ້າ ເພື່ອໃຫ້ສາມາດດຳເນີນງານໄດ້ທັນທີໃນຍາມຮີບດ່ວນ.
- ປະສານງານກັບບັນດາກິດຈະກຳຂອງຂະແໜງການດ້ານເຕັກນິກຕ່າງໆ ໃນຄວາມຮັບຜິດຊອບຕົນເອງ
ສິ່ງທີ່ກ່າວມານັ້ນເປັນພຽງຕົວຢ່າງ. ບໍ່ວ່າບໍລິສັດທີ່ມີຄວາມແຕກຕ່າງການຜະລິດ ແລະ ບໍລິການ ຫຼາຍປານໃດກໍ່ຕາມ, ຕ້ອງໄດ້ກຳນົດໜ້າທີ່ແຕ່ລະຕຳແໜງຢ່າງລະອຽດ. ເພື່ອໃຫ້ທ່ານສາມາດ ປະເມີນຄວາມສາມາດ, ສ້າງການເຝິກອົບຮົມ ແລະ ຄາດຫວັງກັບຜົນງານຕ່າງໆ.
Viengsombath Bangonesengdet Editor in chief
ຊ່ວຍສ້າງສັນສິງເປັນປະໂຫຍດແກ່ສັງຄົມ. ມີຄວາມສາມາດທີ່ມາຈາກປະສົບການ ແລະ ການສຶກສາ ຕິດພັນກັບຂົງເຂດ: ຍຸດທະສາດການບໍລິຫານ, ການຕະຫຼາດ, ການວາງແຜນທຸລະກິດ, ການຄ້າ ທາງອອນໄລ, ນະໂຍບາຍບຸກຂະລາກອນ, ປັບປຸງອົງການຈັດຕັ້ງ, ການສ້າງຍີ່ຫໍ້ສິນຄ້າ ແລະ ສອນ ເຕັກນິກການນຳພາ. ທ່ານສາມາດ ໃຊ້ບໍລິການພິເສດ ຫຼື ຕິດຕາມເຕັກນິກຜ່ານທາງເວັບໄຊນີ້.
