ບໍ່ຢາກໃຊ້ສັບວ່າ “ຕາຍ” ໃນຫົວຂໍ້ໃດໆກະຕາມ. ເຮັດໃຫ້ຮູ້ສຶກຫົດຫູຫຼາຍ. ເຖິງຫຼາຍຄົນຈະຮູ້. ມັນບໍ່ໄດ້ໜ້າຢ້ານຄືທີ່ຄິດ. ຄວາມຕາຍເຮົາຄິດວ່າມັນຈະເຈັບຫຼາຍ. ຕົວຈິງບໍ່ເປັນແນວນັ້ນ. ເຊື່ອແນວນັ້ນ. ເພາະເຄີຍລອດຕາຍມາຫຼາຍ ຄັ້ງຈາກ ອຸບັດຕິເຫດ. ຫາກວັນນັ້ນເປັນວັນສຸດທ້າຍອີຫຼີ, ສິ່ງໜ້າຢ້ານທີ່ສຸດສຳລັບຂ້າພະເຈົ້າ ຄືການບໍ່ບັນລຸໜ້າທີ່ ຂອງການ ມີຊີວິດ. ນັ້ນຄືໄດ້ຮັກ ແລະ ເຮັດໃນສິ່ງທີ່ຮັກ. ທ່ານລອງຕັ້ງຄຳຖາມໃສ່ຕົນເອງເບິ່ງ.
1. ສິ່ງທີ່ທ່ານ ຕ້ອງການ ແລະ ຄວາມຝັນທີ່ແທ້ຈິງ ໃນຊີວິດ? ເມື່ອເຫັນແລ້ວ, ໃຫ້ເລີ່ມເຮັດຄວາມຝັນ. ຖ້າເຮົາບໍ່ຕ້ອງຄຳຖາມເຮົາກໍຈະຫາຈຸດມຸ່ງຫມາຍໃນຊີວິດບໍ່ເຫັນ ຈຶ່ງໃຊ້ຊີວິດໄປແບບໄຮ້ສາລະ ລ່ອງລອຍ. ສາເຫດທີ່ຫລາຍຄົນເວົ້າວ່າເບື່ອເພາະຫາຈຸດມຸ່ງຫມາຍໃນຊີວິດບໍ່ເຫັນ.
2. ໄດ້ເຮັດວຽກທີ່ຕົນເອງຮັກແລ້ວບໍ່? ວຽກທີ່ເຮັດແລ້ວເປັນສຸກ. ບໍ່ຕ້ອງທົນທຸກໄດ້ຮຽນຮູ້ສິ່ງທີ່ບໍ່ຮູ້ ແລະ ເຮັດວຽກໜັກຈົນບໍ່ມີເວລາໃຊ້ຊີວິດ. ມີວຽກເຮັດດີກວ່າບໍ່ມີຫຍັງເຮັດ. ຫາກຈະເຮັດສິ່ງທີ່ທ່ານບໍ່ມັກ, ທ່ານຈະບໍ່ຈົດຈໍກັບການວາງແຜນງານຢ່າງມີລະບົບ ເພາະຢາກໃຫ້ຕົວເອງໃຊ້ເວລາເຮັດວຽກນ້ອຍກວ່າທີ່ເຄີຍເປັນ. ຈົນເຮັດໃຫ້ມີປະສິດທິພາບຫລາຍກວ່າທີ່ທ່ານສາມາດເຮັດໄດ້. ການເຮັດວຽກດັ່ງກ່າວຈະເຮັດໃຫ້ບໍ່ຢາກພັດທະນາທັກສະການເຮັດ ວຽກ. ແນ່ນອນຈະເຮັດໃຫ້ທ່ານບໍ່ສາມາດເສີມສ້າງທັກສະໃນອານາຄົດ ແລະ ບໍ່ອົດທົນເມື່ອພົບກັບບັນຫາໃນ ໜ້າທີ່ວຽກງານ.
3. ຕົນເອງຮູ້ສຶກແນວໃດໃນໜ້າທີ່? ຢ່າລັງເລທີ່ຈະສະແດງຄວາມຮູ້ສຶກທີ່ແທ້ຈິງອອກມາ. ທ່ານເອງຮູ້ດີ. ໃນບາງກໍລະນີ, ຫຼາຍຄົນຍອມເຮັດວຽກເພາະມີໝູ່ຫຼາຍ. ການຍອມເຮັດວຽກທີ່ບໍ່ມັກເພື່ອໃຫ້ໄດ້ຢູ່ໃກ້ໆໝູ່ ອາດເຮັດໃຫ້ທ່ານເສຍຄວາມຮູ້ສຶກ ໃນເມື່ອເຂົາເຈົ້າອາດມີການໂຍກຍ້າຍໜ້າທີ່ ຫຼື ປ່ຽນທີ່ພັກອາໃສ. ມັນມີ ຄວາມຈຳເປັນແທ້ບໍ່ທີ່ຈະຕ້ອງຢູ່ໃກ້ໆກັບໝູ່ທີ່ທ່ານມັກ ໃນທຸກໆວັນ. ການເຮັດວຽກເໜາະສົມກັບອຸດົມ ການຂອງ ທ່ານ ໜ້າຈະເປັນການສ້າງມິດໃໝ່ດີໆໄດ້ຄືກັນ. ທ່ານອາດຍອມເສຍເພື່ອນໃນວັນນີ້ ເພື່ອວຽກທີ່ຕົນເອງມັກ ແລະ ອາດເຮັດໃຫ້ທ່ານໄດ້ພົບເພື່ອນໃໝ່ໃນອານາຄົດ.
4. ໃຫ້ຄວາມສຳຄັນກັບໃຜແດ່? ຄວນຈັດເວລາໃຫ້ກັບຄົນສຳຄັນຫລາຍຂຶ້ນ ຄົນສຳຄັນທີ່ຫມາຍເຖິງ ພໍ່ແມ່ພີ່ນ້ອງຄົນໃນຄອບຄົວ. ໃນຊີວິດຈິງ, ບາງຄອບຄົວແຕກແຍກ, ຄົນໃກ້ຕົວ ບໍ່ໄດ້ເຮັດໃຫ້ຊີວິດເຂົາເຈົ້າດີຂື້ນ. ຊໍ້າບໍ່ໜໍາ ອາດເປັນສັດຕູກັບພີ່ນ້ອງກັນເອງ. ຄຳວ່າ “ຄົນສຳຄັນ” ໃນຄວາມຫມາຍຂອງທ່ານ, ອາດບໍ່ຈຳເປັນຕ້ອງຄືດັ່ງທີ່ໄດ້ຍົກ ຂື້ນມາກ່ອນໜ້ານີ້. ຄຳວ່າຄົນສຳຄັນໃນຄວາມຫມາຍຂອງຂ້າພະເຈົ້ານັ້ນຄື ຄົນທີ່ມີຄວາມສຸກທີ່ໄດ້ໃຊ້ເວລານຳກັນ, ຄົນທີ່ເຮັດໃຫ້ມີຄວາມສຸກເມື່ອໄດ້ຢູ່ໃກ້, ຄົນທີ່ຮັກແລະຫ່ວງໃຍ ຫລື ຄົນທີ່ເຮົາຮູ້ສຶກຫ່ວງໃຍ, ຄົນທີ່ນຳພາຊີວິດ ທ່ານໃນຍາມລຳບາກໃຫ້ດີຂື້ນ ແລະ ຍາມດີໃຫ້ດີຂື້ນອີກ. ຄົນໃດທີ່ບໍ່ມີຄວາມສຸກກັບການຢູ່ໃກ້ ຫລື ຄົນທີ່ມີທັດສະນະຄະຕິລົບ, ຄົນທີ່ບໍ່ເຄິຍສະຫນັບສະຫນຸນສົ່ງເສີມ ແລະ ເຮັດໃຫ້ເປັນທຸກສະເຫມີ, ຂ້າພະເຈົ້າຈະບໍ່ຈັດເປັນຄົນສຳຄັນ.
5. ຈັດເວລາໃຫ້ຊີວິດຢ່າງສົມດຸນແລ້ວບໍ່? ທ່ານຄວນໃຫ້ຂອງຂັວນກັບຕົວເອງໄດ້ເຮັດກິດຈະກຳອື່ນໆນອກຈາກ ວຽກງານ. ເປັນຕົ້ນ ໄປທ່ອງທ່ຽວ, ອ່ານຫນັງສື, ຟັງເພັງ, ເບິ່ງຫນັງດີ, ອອກກຳລັງກາຍ, ສ້າງງານສິນລະປະ, ເບິ່ງແຍງຕົວເອງໃຫ້ມີສຸຂະພາບກາຍ ແລະໃຈທີ່ດີ. ການເລືອກຄິດສິ່ງດີໆ ແລະ ຫາໂອກາດໃຫ້ຕົນເອງຢູ່ກັບທຳມະຊາດ, ອອກກຳລັງກາຍໃຫ້ເປັນນິດໃສ, ພະຍາຍາມໃຫ້ອະໄພແກ້ບັນຫາ ແລະ ປ່ອຍວາງທຸກເລື່ອງໃຫ້ໄວທີ່ສຸດເພາະບໍ່ຢາກໃຫ້ຕົວເອງຄຽດແລະຄິດຫລາຍ. ເພາະຄວາມຄຽດເປັນຕົ້ນກຳເນີດຂອງໂລກຮ້າຍຫລາຍຊະນິດ.
ສິ່ງທີ່ສຳຄັນທີ່ສຸດຄືເບິ່ງແຍງຮ່າງກາຍ ແລະ ຈິດໃຈໃຫ້ດີ ໃຊ້ຊີວິດຢ່າງສົມດຸນ, ໃຫ້ຂອງຂັວນຊີວິດກັບຕົວເອງສະໜໍ່າສະໜີ.ຮ່າງກາຍຂອງເຮົາ ຄືບ້ານຫຼັງສຸດທ້າຍຂອງຊີວິດ ທີ່ທ່ານຕ້ອງຮັກສາໃຫ້ດີ. ໃນຊ່ວງເວລາສຸດທ້າຍສິ່ງທີ່ທ່ານຕ້ອງການທີ່ສຸດບໍ່ແມ່ນບ້ານຫລັງໃຫ່ຍແຕ່ເປັນຮ່າງກາຍທີ່ແຂງແຮງ.
Viengsombath Bangonesengdet Editor in chief
ຊ່ວຍສ້າງສັນສິງເປັນປະໂຫຍດແກ່ສັງຄົມ. ມີຄວາມສາມາດທີ່ມາຈາກປະສົບການ ແລະ ການສຶກສາ ຕິດພັນກັບຂົງເຂດ: ຍຸດທະສາດການບໍລິຫານ, ການຕະຫຼາດ, ການວາງແຜນທຸລະກິດ, ການຄ້າ ທາງອອນໄລ, ນະໂຍບາຍບຸກຂະລາກອນ, ປັບປຸງອົງການຈັດຕັ້ງ, ການສ້າງຍີ່ຫໍ້ສິນຄ້າ ແລະ ສອນ ເຕັກນິກການນຳພາ. ທ່ານສາມາດ ໃຊ້ບໍລິການພິເສດ ຫຼື ຕິດຕາມເຕັກນິກຜ່ານທາງເວັບໄຊນີ້.
