ຄຳສັ່ງສອນໂບຮານທີ່ວ່າ: ໄມ້ລຳດຽວລ້ອມຮົ້ວບໍ່ໄຂວ່, ໄພ່ບໍ່ພ້ອມແປງບ້ານບໍ່ເຮືອງ. ເປັນການບອກໃຫ້ ຄົນຮ່ວມເຮັດຮ່ວມສ້າງສາ.
ແນວໃດກໍ່ຕາມ, ເຖິງວ່າຈະມີຄົນຫຼາຍຄົນຊຳໃດໃນກຸ່ມກ້ອນ ແຕ່ຫາກບໍ່ຄິດພັດທະນາ, ບໍ່ມີຄວາມສາມາດ ແລະ ຂາດສິນທຳແລ້ວ, ຄົນເຫຼົ່ານັ້ນກໍ່ຈະບໍ່ສ້າງຜົນປະໂຫຍດຫຍັງໃຫ້ແກ່ສັງຄົມ. ກົງກັນຂ້າມແຮງຈະນຳຜົນເສຍອັນມະຫາສານມາສູ່ສັງຄົມຢ່າງບໍ່ຕ້ອງສົງໃສ.
“ແນວໃດກໍ່ຕາມ, ເຖິງວ່າຈະມີຄົນຫຼາຍຄົນຊຳໃດໃນກຸ່ມກ້ອນ ແຕ່ຫາກບໍ່ຄິດພັດທະນາ, ບໍ່ມີຄວາມສາມາດ ແລະ ຂາດສິນທຳແລ້ວ, ຄົນເຫຼົ່ານັ້ນກໍ່ຈະບໍ່ສ້າງຜົນປະໂຫຍດຫຍັງໃຫ້ແກ່ສັງຄົມ. ກົງກັນຂ້າມແຮງຈະນຳຜົນເສຍອັນມະຫາສານມາສູ່ສັງຄົມຢ່າງບໍ່ຕ້ອງສົງໃສ.”
ໃນປະຫວັດສາດກູ້ຊາດຫຼາຍສະໄໝ, ເຮົາມັກຈະໄດ້ຍິນວິລະຊົນ, ຜູ້ນຳທີ່ເກັ່ງກ້າ ຫຼື ຫຼາຍໆນາມມະຍົດ. ແຕ່ໃນເບື້ອງຫຼັງຂອງບຸກຄົນດັງດັ່ງກ່າວນັ້ນ ກໍ່ຈະເຕັມໄປດ້ວຍທີມງານທີ່ມີຄວາມສະຫຼຽວສະຫຼາດ ແລະ ໃຫ້ການຮ່ວມມືໃນຊ່ວງການສ້າງສັນ. ເຊັ່ນດຽວກັບການປະຕິວັດຂອງລາວ, ການສ້າງຕັ້ງບໍລິສັດດັງໆ ແລະ ເບື້ອງຫຼັງຂອງນັກສະແດງ ຫຼື ສິນລະປິນທີ່ມີຊື່ສຽງ. ສິ່ງດັ່ງກ່າວເປັນການສະທ້ອນໃຫ້ເຫັນວ່າ ຄວາມສຳເລັດໃດໆກໍ່ຕາມລ້ວນແລ້ວແຕ່ເກີດຈາກການຮ່ວມມື.
ການຈະພັດທະນາປະເທດຊາດໃຫ້ຈະເລີນກ້າວໜ້າ, ກໍ່ຕ້ອງອາໄສຄົນລາວທຸກຄົນ. ໂດຍສະເພາະຄົນລາວຍຸກໃໝ່ ທີ່ຈະຕ້ອງໄດ້ພັດທະນາຕົນເອງໃຫ້ທັນກັບຍຸກສະໄໝ ແລະ ກ້າວສູ່ເວທີສາກົນ. ຄຸນສົມບັດທີ່ຄົນລາວຍຸກໃໝ່ຄວນມີ:
- ມີຄວາມຮູ້ຄວາມສາມາດ: ຕ້ອງພະຍາຍາມຮຽນຮູ້ສິ່ງໃໝ່ໆຢູ່ສະເໝີ. ບໍ່ວ່າຈະເປັນດ້ານພາສາ, ເຕັກໂນໂລຊີ, ຫຼື ວິຊາສະເພາະ. ການສຶກສາບໍ່ໄດ້ຈຳກັດຢູ່ແຕ່ໃນຫ້ອງຮຽນ, ການຮຽນຮູ້ດ້ວຍຕົນເອງຈາກແຫຼ່ງຂໍ້ມູນຕ່າງໆກໍ່ສຳຄັນ.
- ມີຄວາມຮັບຜິດຊອບ: ຕ້ອງຮູ້ຈັກໜ້າທີ່ຂອງຕົນເອງ ແລະ ຮັບຜິດຊອບຕໍ່ຜົນການກະທຳຂອງຕົນເອງ. ບໍ່ປັດຄວາມຮັບຜິດຊອບໃຫ້ຄົນອື່ນ ແລະ ກ້າທີ່ຈະຍອມຮັບຄວາມຜິດພາດ.
- ມີຄວາມຊື່ສັດສຸຈລິດ: ເປັນຄຸນສົມບັດພື້ນຖານທີ່ສຳຄັນທີ່ສຸດ. ຕ້ອງຊື່ສັດຕໍ່ຕົນເອງ ແລະ ຜູ້ອື່ນ, ບໍ່ສໍ້ໂກງ ຫຼື ເອົາປຽບຜູ້ອື່ນ.
- ມີຄວາມເຄົາລົບນັບຖື: ຕ້ອງເຄົາລົບນັບຖືຜູ້ອາວຸໂສ, ເຄົາລົບສິດທິຂອງຜູ້ອື່ນ, ແລະ ເຄົາລົບກົດໝາຍຂອງບ້ານເມືອງ.
- ມີຄວາມອົດທົນ: ຄວາມສຳເລັດບໍ່ໄດ້ມາຢ່າງງ່າຍດາຍ. ຕ້ອງມີຄວາມອົດທົນຕໍ່ອຸປະສັກ ແລະ ຄວາມຍາກລຳບາກ. ບໍ່ຍອມແພ້ງ່າຍໆ.
- ມີຄວາມສາມາດໃນການປັບຕົວ: ໂລກປ່ຽນແປງຢູ່ຕະຫຼອດເວລາ. ຕ້ອງສາມາດປັບຕົວເຂົ້າກັບສະຖານະການໃໝ່ໆໄດ້ຢ່າງວ່ອງໄວ. ພ້ອມທີ່ຈະຮຽນຮູ້ ແລະ ຍອມຮັບສິ່ງໃໝ່ໆ. ນະໂຍບາຍຂອງລັດຖະບານກໍ່ມີຄວາມຊັດເຈນ ແລະ ລະບົບການດ້ານນິຕິກຳ ກໍ່ຈະມີການດັດປັບໃຫ້ມີຄວາມສອດຄ່ອງ ແລະ ເປັນໄປຕາມ ກົນໄກສາກົນຫຼາຍຂຶ້ນ. ທີ່ແນ່ນອນ ຖ້າຫາກຄົນລາວຍັງບໍ່ສາມາດດັດ ປັບຕົນເອງໄປຕາມກົດລະບຽບ ໃໝ່ນັ້ນແລ້ວ ກໍ່ຈະເຮັດໃຫ້ເປັນການ ສ້າງ ສິ່ງກີດຂວາງການພັດທະນາ ແລະ ສ້າງຄວາມບໍ່ໄວ້ວາງໃຈ. ເຊັ່ນ: ພຶດຕິກຳການບໍ່ປະຕິບັດໂມງເວລາ ອາດຈະຕ້ອງໄດ້ຫັນສູ່ເວລາຫຼາຍຂຶ້ນ. ການນັດພົບທີ່ບໍ່ຕົງເວລາ ອາດເປັນການສະແດງໃຫ້ເຫັນວ່າບໍ່ໃຫ້ ຄວາມສຳຄັນກັບການພົບປະ.
- ມີຄວາມຮັກວັດທະນະທຳ: ສິ່ງນີ້ສຳຄັນຫຼາຍ ເພາະຈະມີຫຼາຍວັດທະນະທຳເຂົ້າມາ. ຄົນລາວເຮົາຕ້ອງຮູ້ຈັກປະຍຸກ, ດັດແປງ ແລະ ເລືອກສິ່ງທີ່ດີ ທີ່ຈະຜັກດັນວັດທະນະທຳລາວໃຫ້ມີຄວາມກ້າວໜ້າ ແລະ ໂດດເດັ່ນໃນເວທີສາກົນ. ຄຳວ່າວັດທະນະທຳນັ້ນ ກໍ່ກວມເອົາຫຼາຍໆຂົງເຂດ. ສິ່ງທີ່ຈະຍົກມາ ກໍ່ມີພາສາລາວ. ຄົນລາວຍຸກໃໝ່ນອກຈາກຈະເກັ່ງພາສາ ຕ່າງປະເທດໃດໜຶ່ງ ຍັງຕ້ອງໄດ້ອະນຸລັກ ແລະ ນຳໃຊ້ພາສາລາວໃຫ້ຖືກຕ້ອງອີກດ້ວຍ.
ໃນ 7 ຂໍ້ນີ້, ທ່ານຄິດວ່າຂໍ້ໃດທີ່ຄົນລາວເຮົາຕ້ອງເລັ່ງພັດທະນາຫຼາຍທີ່ສຸດໃນຍຸກນີ້? 👇
