ຕາມຖະໜົນຫົນທາງທົ່ວທຸກແຂວງ ແລະ ໃນບາງເຂດຂອງນະຄອນຫຼວງວຽງຈັນ ກໍ່ມັກຈະພົບເຫັນ ທົ່ງນາປູກເຂົ້າ. ຖ້າຈະທຽບຄວາມງາມແລ້ວ ກໍ່ບໍ່ຕ່າງຫຍັງກັບສວນດອກໄມ້ ທີ່ມີການເຕີບໃຫຍ່ຂະຫຍາຍຕົວແຕ່ກ້າເຂົ້າ ຈົນຮອດກາຍເປັນຮວງທີ່ຫອມຫວນ ພ້ອມເກັບກ່ຽວ. ຈື່ໄດ້ໃນຍາມຍັງນ້ອຍ, ທົ່ງນາ ມັກຈະເປັນບ່ອນທີ່ເດັກນ້ອຍຫຼາຍກຸ່ມ ໃຊ້ເວລາຫວ່າງ ໃນການຫາກະປູ, ປານ້ອຍ ແລະ ເປັນບ່ອນຍ່າງຫຼິ້ນ. ເຂົ້າ ມີຄວາມໝາຍໃຫ້ແກ່ ສ ປ ປ ລາວ ນອກຈາກເຂົ້າຈະເປັນອາຫານ ແລະ ວັດທະນະທຳສ້າງຊື່ສຽງໃຫ້ແກ່ລາວ ເຂົ້າຍັງເປັນສິນຄ້າຫຼັກໃຫ້ແກ່ຊາວນາລາວ.
“ເຂົ້າມີຄວາມໝາຍໃຫ້ແກ່ ສ ປ ປ ລາວ ນອກຈາກເຂົ້າຈະເປັນອາຫານ ແລະ ວັດທະນະທຳສ້າງຊື່ສຽງໃຫ້ແກ່ລາວ ເຂົ້າຍັງເປັນສິນຄ້າຫຼັກໃຫ້ແກ່ຊາວນາລາວ.”
ເຂົ້າເປັນອາຫານ ສານອາຫານຫຼັກຂອງຄົນລາວກໍ່ຄືເຂົ້າ. ບໍ່ວ່າຈະເຂົ້າໜຽວ ຫຼື ເຂົ້າຈ້າວ. ປະຊາຊົນລາວກິນເຂົ້າເປັນອາຫານຫຼັກ ປະມານສອງຮ້ອຍກິໂລ ຕໍ່ຄົນຕໍ່ປີ. ເຂົ້າໜຽວຈໍ້າແຈ່ວ ຫຼື ປາແດກ ເປັນອາຫານທີ່ຄົນລາວທຸກຄົນຄຸ້ນເຄີຍ ແລະ ຂາດບໍ່ໄດ້ໃນຊີວິດປະຈຳວັນ.
ເຂົ້າເປັນວັດທະນະທຳ ການປູກເຂົ້າໄດ້ຕິດພັນກັບປະເພນີ ແລະ ວັດທະນະທຳຂອງຄົນລາວມາແຕ່ດົນນານ. ບຸນບັ້ງໄຟ ເປັນການຂໍຝົນຈາກພະຍາແຖນ ເພື່ອເຮັດໃຫ້ຊາວນາສາມາດເລີ່ມການຜະລິດເຂົ້າ. ບຸນຊ່ວງເຮືອ ເປັນການຂອບໃຈເທວະດາຟ້າແຖນ, ພະຍານາກ ແລະ ເບື້ອງບົນ ທີ່ປະທານປັດໃຈໃນການຜະລິດ ແລະ ສ້າງຄວາມມ່ວນຊື່ນໃນການສະເຫຼີມສະຫຼອງ ລະດູການເກັບກ່ຽວທີ່ຫາກໍ່ສຳເລັດ. ຍັງມີຫຼາຍໆປະເພນີ ເຊັ່ນ ບຸນເຂົ້າປະດັບດິນ ແລະ ເທດສະການອື່ນໆຕິດພັນກັບເຂົ້າລາວ. ກິດຈະກຳດັ່ງກ່າວ ເປັນການສະແດງຄວາມສາມັກຄີ, ຮີດຄອງ ແລະ ລະດົມໃຫ້ນັກທ່ອງທ່ຽວເຂົ້າມາໃນລາວ ເປັນການສ້າງລາຍຮັບໃນແກ່ທຸລະກິດການທ່ອງທ່ຽວລາວ. ຍັງມີຫຼາຍໆບົດກອນ ແລະ ສຽງເພງແຕ່ງກ່ຽວກັບເຂົ້າ. ສຽງເພງໜຶ່ງທີ່ຈົດຈຳກໍ່ຄື: ເຢັນສະບາຍຊາວນາ. ທີ່ຮ້ອງໂດຍ ນັກສິນລະປິນດັງລາວ, ທ່ານ ບົວເງິນ ຊາພູວົງ. ເນື້ອເພງໄດ້ບັນຍາຍເຖິງຄວາມມ່ວນຊື່ນ ແລະ ຄວາມພາກພູມໃຈຂອງຊາວນາໃນເວລາເກັບກ່ຽວ.
ເມື່ອເວົ້າເຖິງ “ເຂົ້າລາວ” ບໍ່ວ່າຈະເປັນເຂົ້າໜຽວ ຫຼື ເຂົ້າຈ້າວ, ທ່ານຄິດຮອດອາຫານເມນູໃດກ່ອນໝູ່? ມາແບ່ງປັນກັນ! 👇
